د افغانستان په غزني ولایت کې  پر دوو امنیتي پوستو  خونړی برید شوی دی.

د غزني ولایت د والي ویاند محمد عارف نوري خبري رسنیو ته وویل چې  تیره شپه  طالبانو د غزني ښار  د دریمې امنیتي حوزې په مربوطاتو کې  پر دوو امنیتي پوستو  وسله وال برید کړی دی.

هغه ویلي دي چې پدې برید کې  له بده مرغه چې  ۹ تنو پولیسو ژوند د لاسه ورکړی دی.

هغه وویل چې  برید د شپې د یوې بجې په شاوخوا کې شوی دی. د هغه په وینا  د برید نه وروسته د طالبانو او پولیسو ترمنځه نښته پيل شوه چې وروسته د دریمې حوزې امر چې  د پولیسو مرستې ته روان وو  په لاره کې  د طالبانو په کمین کې  وژل شوی دی.

پدې نښته کې  ۶ تنه پولیس ټپیان شوي دي  چې د بعضو روغتیايي حالت يي ښه ندی.

د پیښې مسئولیت  طالبانو پر غاړه اخیستی دی. طالبانو  پدې برید کې د ۱۶ تنو پولیسو د وژلو ادعا کړې ده . همداشان  یوې بلې سرچینې هم  پدې برید کې د ۱۶ تنو افغان پولیسو د وژل کیدو نه خبر ورکړی دی.