طالبانو  د افغانستان په شمال کې  د تاله و برفک ولسوالۍ  ونیوله

 طالبانو  د افغانستان په شمال کې  د تاله و برفک ولسوالۍ  ونیوله

طالبانو  د بغلان ولایت  د تاله و برفک  ولسوالۍ  د افغان امنیتي ځواکونو نه ونیوله.

د بغلان ولایت د تاله و برفک ولسوالۍ ولسوال  فیض محمد امیري د اناتولیا خبري اژانس ته ویلي دي  د تیرو څلورو ورځو راهیسې  د روانې زورورې  جګړې په پایله کې  طالبان  وتوانیدل  چې  ولسوالۍ د امنیتي ځواکونو نه ونیسي.

امیري زیاته کړه چې  افغان امنیتي ځواکونه  پرون د مازیګر په ساعتونو کې  په شا تګ ته  مجبور شول. طالبانو په یاده شوې ولسوالۍ کې  ټولې دولتي ودانۍ  د خپل کنټرول لاندې راوستي دي.

هغه ویلي دي چې  پدې نښتو کې دواړو خواوو ته  درانده ځاني زیانونه اوښتي دي  او افغان ځواکونه  د ولسوالۍ د بیرته نیولو په خاطر عملیات پيل کړي دي.

د طالبانو ویاند  ذبیح الله مجاهد  د تاله و برفک ولسوالۍ د نیولو نه خبر ورکړ. هغه ویلي دي چې د ولسوالۍ ټول دولتي ادارات  ددوې لخوا نیول شوي دي.

هغه  پدې نښته کې افغان ځواکونو ته  د ځاني زیانونو اړولو ادعا کړې ده .

طالبانو پداسې حال کې  د تاله و برفک  ولسوالۍ د نیولو نه خبر ورکړ چې پرون يي  د پلازمینې کابل  په لویدیځ او ختیځ  سیمو کې  په امنیتي ارګانونو  پراخه ډله ییز بریدونه ترسره کړل.

طالبانو د کابل په پل سوخته سیمه  په شپږمې امنیتي حوزې ډله ییز برید وکړ چې  او تر ماښام ساعتونو پورې  د افغان ځواکونو سره وجنګیدل. نښته  د ټولو برید کوونکو په وژلو سره  د ماښام په ساعتونو کې پایته ورسیده.

طالبانو تیره ورځ  په کابل کې د پراخه بریدونو سره  ۱۶ تنه مړه  او تر ۵۰ ډیر کسان ټپیان کړل.