په جلال آباد كې ځانمرګى بريد

د افغانستان په ختيځ كې د ننګرهار ولايت په مركز جلال آباد كې د ځانمرګي بريد خبر را رسېدلى دى. ويل كيږي چې دا بريد ددې ولايت د پچير اګام د ولسوالۍ د يو مخور سپين ږيري په كور كې شوى دى. دا پېښه د شپږمې امنيتي حوزې په مربوطاتو كې په داسې حال كې ترسره شوې ده چې د قومي مشر په كور كې يو شمېر كسانو په يوې غونډه كې ګډون درلود.

ويل كيږي چې ځانمرګي د خلكو ترمېنځ په ځان پورې تړلي چاودېدونكي مواد چاودولي دي.

كه څه هم د پېښې د تلفاتو په څېر رسمي څرګندونې نه دي شوې خو د عيني شاهدانو په وينا لږ تر لږه ۸ تنه وژل شوي او  اوه تنه نور هم ټپيان دي.

د پېښې په اړه نور جزييات به وروسته خپاره شي.