په غزني کې د محکمې په ودانۍ ډله ایز برید وشو

 د افغانستان په غزني ولایت کې  د محکمې او څارنوالۍ په ودانیو  ډله ایز برید وشو.

د ترلاسه شوو معلوماتو له مخې  پدې پیښه کې  د یو تن پولیس او ۴ تنو ملکي وګړو به ګډون  ۵ تنو ژوند د لاسه ورکړی  دی  او ۱۱ تنه نور ټپیان شوي دي.

همداشان  امنیتي ځواکونو  د ۶ واړو  برید کوونکو د وژلو نه خبر ورکړی دی.

د غزني د والي ویاند خبري رسنیو ته ویلي دي چې نن د سهار د لسو بجو په شاوخوا کې  برید کوونکو لومړی  د موټر پر مټ چاودنه وکړه او وروسته  ځیني برید کوونکي  محکمې ودانۍ ته  داخل شول.

د چاودنې نه وروسته  د برید کوونکو  او امنیتي ځواکونو ترمنځه  نښته پیل شوه.

د غزني ولایت د امنیې قومندان  امین الله امرخیل  خبري رسنیو بیا ویلي دي چې  برید کوونکو  د غزني  د استیناف محکمې  د یو تن ساتونکي  پولیسو د وژلو نه وروسته محکمې ودانۍ ته ننوتل.

هغه ویلي دي چې  پولیسو  د برید کوونکو د لمنځه وړ په خاطر  په چټکه توګه  حرکت وکړ  او د پنځو دقیقو په دننه کې  ټول برید کوونکي له خپو وغورځول.

د غزني د امنیې قومندان ویلي دي چې  برید کوونکو  د محکمې سربیره  د امنیې په قومندانۍ هم  د برید هوډ  درلود چې  خپلې موخې ته ونه رسیدل. هغه وویل چې  د امنیې قومندانۍ او محکمه په یوې سیمه کې  موقعیت لري چې د همدې امله په دواړو د برید پلان  جوړ شوی وو.

د برید مسولیت  طالبانو په غاړه اخیستی دی . د طالبانو ویاند  ذبیح الله مجاهد  د ټویټر له لارې په کړو څرګندونو کې  د برید مسولیت په غاړه اخیستی دی او ویلي دي چې نن سهار يي په غزني کې  د محکمې او څارنوالۍ په ودانیو بریدونه کړي دي.

د یادولو وړ ده  چې  طالبانو تیره ورځ  د کندوز  د علي اباد په ولسوالۍ کې نږدې ۲۰۰ تنه مساپر د موټرو نه ښکته کړل چې  ۱۵۰ تنه يي خوشې او پاتې کسان يي د ځان سره بوتلل. طالبانو د برمته کړو کسانو نه  ۱۶ تنه  وژلي دي او د پاتو کسانو برخلیک  معلوم  ندی.