په كابل د ملي امنيت پر يوې ودانۍ بريد
د كابل ولايت د رحمان مېنې په سيمه كې د ملي امنيت پر يوې ودانۍ باندې د وسله والو لخوا بريد شوى دى.
335725
دا بريد نن په ځايي و خت د غرمې وروسته شاوخوا ۱ يوه بجه د رحمان مېنې په دوه سوه فاميليو كې د ذبېح الله عصمتي لېسې ته نږدې شوى دى.
ويل كيږي چې د ودانۍ مخې ته چاودنه شوې او بيا وروسته وسله والو ډزې كړي دي.
د بله پلوه د ملي امنيت ادارې د يوې اعلاميې په خپرولو سره د بريد پخلى وكړ. ددې ادارې د معلوماتو په اساس بريد د دوو تنو ځانمرګو بريد كوونكو لخوا ترسره شوى وو چې دواړه د امنيتي ځواكونو په ډزو كې وژل شوي دي.
د لومړنيو معلوماتو له مخې په بريد كې د ملي امنيت يو تن كار كوونكى وژل شوى دى او يو بل تن ټپي دى.
د بريد اړه نور جزييات به وروسته خپاره شي.
