Хулуси Акар хорватиялык кесиптеши менен жолугушту
Акар расмий конок катары Түркияга келген Банозичти Улуттук коргоо министрлигинде аскердик азем менен тосуп алды.
Улуттук коргоо министри Хулуси Акар Хорватиянын коргоо министри Марио Банозич менен жолугушту.
Акар расмий конок катары Хорватиянын башкы штабынын төрагасы адмирал Роберт Хранж менен бирге Түркияга келген Банозичти Улуттук коргоо министрлигинде аскердик азем менен тосуп алды.
Бетме-бет жана делегациялар ортосундагы жолугушуулардан кийин Акар менен Банозич маалымат жыйынын өткөрүштү.
Банозич менен Түркия жана Хорватиянын ортосундагы коргонуу, коопсуздук темаларында маалымат алмашкандарын түшүндүргөн Акар: «Сүйлөшүүлөрүбүз абдан жемиштүү жана конструктивдүү болду. Көптөгөн темада бирдей пикирде экенибизге кубанычтабыз»,- деди.
Акар, 6-февралда эпицентри Кахраманмараш болгон жер титирөөлөрдөн кийин башталган иштерге 91 өлкөнүн ар кандай жолдор менен салым кошконун, алардын арасында Хорватиянын да бар экенин айтып: «Хорват өкмөтүнө, элине, министрине жана башка өлкөлөргө да көрсөткөн колдоосу жана салымы үчүн ыраазычылык билдиргим келет»,-деди.
Банозич менен аскердик билим берүү кызматташтыгы жана коргонуу өнөр жайы темаларында кеңири сүйлөшүү мүмкүнчүлүгүнө ээ болгондорун белгилеген Акар: «Евроатлантикалык коопсуздук темасында НАТОнун алкагында Түркия менен Хорватиянын ортосундагы кызматташтыктын НАТОго да, аймакка да олуттуу салым кошору боюнча макулдаштык»,-деп айтты.
Акар коргонуу жана коопсуздук тармагындагы кызматташтыктын Түркия менен Хорватия үчүн гана эмес, Балкан өлкөлөрүн, аймактагы тынчтык жана ырааттуулук үчүн да маанилүү экенин баса белгиледи.
Хорватиянын коргоо министри Банозич да жер титирөөлөргө байланыштуу көңүл айтып, ар дайым жардам берүүгө даяр экендиктерин айтты.
Банозич 2020-жылы Хорватиянын Петрижа шаарында болгон жер титирөөдөн кийин Түркиянын көрсөткөн жардамы үчүн ыраазычылык билдирди.
Эки өлкөнүн ортосундагы кызматташтыктын аскердик темалар менен бирге коргонуу өнөр жайында да жакшы уланып жатканын баса белгилеген Банозич, министр Акарды «Европанын түштүгүндөгү эң чоң аймактык аскердик жарманке» деп мүнөздөлгөн Адриатика аскердик жана авиация жарманкесине чакырды.
