Уимблдонго катышуу үчүн жарандыгын өзгөрттү

Орусиялык теннисчи Натела Дзаламидзе сезондун үчүнчү чоң шлем турнири болгон Уимблдонго катышуу үчүн Грузиянын жарандыгын алды.

Москвада төрөлгөн 29 жаштагы Дзаламидзе Белоруссия колдогон Орусия менен Украинанын ортосунда жүрүп жаткан согуштан улам белорусиялык жана орусиялык теннисчилерге уруксат берилбеген Уимблдонго катышуу үчүн ушундай ыкманы колдонду.

Тема боюнча баа берген Уимблдон жетекчилиги болсо бул ыкмага тоскоол боло турган «күчтөрү жок» экенин, Беларусь жана орус теннисчилеринин башка өлкөнүн жараны болуп турнирге катышуусуна тоскоол боло албастыгын билдирди.

Сезондун экинчи чоң шлем турнири болгон Франциянын ачык чемпионатына "нейтралдуу атлет" наамы менен катышкан Натела Дзаламидзе, Аялдар теннис ассоциациясынын (WTA) ушундай эле категориядагы иш-чараларында төрт жолу чемпиондукту жеңип алган.

Уимблдон 27-июндан 10-июлга чейин өтөт.