ЕБ менен НАТОнун биргелешкен жумушчу тобу түзүлдү

Европа Биримдиги (ЕБ) жана НАТО маанилүү инфраструктурага коркунучтарды аныктоо жана кемчиликтерди жоюу үчүн биргелешкен жумушчу топту ишке киргизди.

Евробиримдик комиссиясынын төрайымы Урсула фон дер Ляйен жана НАТОнун баш катчысы Йенс Столтенберг Евробиримдиктин коргоо жана коопсуздук боюнча комиссиясынын мүчөлөрүнүн жыйынына катышар алдында басма сөзгө билдирүү жасашты.

Фон дер Ляйен ЕБ менен НАТОнун эксперттери орчундуу инфраструктурага жана стратегиялык жактан алсыз аймактарга коркунучтарды аныктоо жана аларды жоюу боюнча биргелешкен жумушчу топ түзүшкөнүн жарыялады.

Эксперттердин биринчи этапта транспорт, энергетика, санариптештирүү жана космоско көңүл бура турганын жана тыянактарын ЕБ жана НАТО мүчөлөрү менен бөлүшө тургандарын айткан фон дер Ляйен маалымат жана тажрыйба алмашуу жана эрте эскертүү өнөктөштүктүн негизи болоорун белгиледи.

Фон дер Ляйен Столтенберг да катыша турган коргонуу жана коопсуздук жыйынында Украинага ар тармакта бериле турган колдоолор жана Европага карата коркунучтар карала турганын айтты.

Европа Биримдиги менен НАТОнун кызматташтыгын кийинки баскычка алып чыгуу үчүн кечээ орток декларацияга кол койгонун эске салган Столтенберг, геосаясий атаандаштыктын күчөшү, коопсуздукту коркунучка салган технологиялар, климаттын өзгөрүшүнүн коопсуздукка тийгизген терс таасирлери сыяктуу тармактарда биргелешип иш алып барышарын айтты.

Бүгүн башталган НАТО-Европа Биримдиги жумушчу тобунун маанилүү инфраструктураны, технологияны жана камсыздоо чынжырларын потенциалдуу коркунучтарга каршы туруктуураак кылууну максат кылганын баса белгилеген Столтенберг, Украинага колдоо көрсөтүүнүн маанисине басым жасады.

Столтенберг АКШ, Франция жана Германиянын Украинага жөө аскерлердин согуштук унааларын жана жеңил танктарды берүү чечимин кубаттады.