ქალაქ შევჩენკოვზე რუსების მიერ განხორციელებული სარაკეტო თავდასხმის შედეგად ერთი ადამიანი დაიღუპა

ხარკოვის ოლქის კუპიანსკის რაიონში, ქალაქ შევჩენკოვზე რუსების მიერ განხორციელებული სარაკეტო თავდასხმის შედეგად ერთი ადამიანი დაიღუპა და 7 დაშავდა.

უკრაინის პრეზიდენტის აპარატის უფროსის მოადგილემ კირილო ტიმოშენკომ Telegram-ზე გავრცელებულ განცხადებაში აღნიშნა, რომ რუსული ძალების მიერ ქალაქ შევჩენკოვზე განხორციელებული თავდასხმის დროს რაკეტები ბაზარს მოხვდა.

ტიმოშენკოს თქმით, თავდასხმის შედეგად 60 წლის ქალი დაიღუპა, 7 მშვიდობიანი მოქალაქე დაშავდა და შემთხვევის ადგილზე სამძებრო-სამაშველო სამუშაოები გრძელდება.

მისივე განცხადებით, ვარაუდობენ, რომ თავდასხმა S-300 სარაკეტო სისტემით განხორციელდა.

ხარკოვის ოლქის სამხედრო ადმინისტრაციის ხელმძღვანელმა (გუბერნატორმა) ოლეგ სინეგუბოვმა ასევე განაცხადა, რომ თავდასხმის შედეგად დაშავებულთა შორის ერთი 13 წლის გოგონაა.