რუსეთმა და ბელარუსმა ერთობლივი წვრთნები დაიწყეს

რუსეთმა და ბელარუსმა „მოკავშირეობის სიმტკიცე 2022“  სახელწოდების სამხედრო წვრთნები დაიწყეს. რუსეთის თავდაცვის სამინისტროს განცხადებით, სწავლებაში ბელარუსის შეიარაღებული ძალების ზოგიერთი სამხედრო ნაწილი და რუსეთის შეიარაღებული ძალების აღმოსავლეთის სამხედრო ოლქის  ნაწილები მონაწილეობენ. წვრთნებში ასევე ჩართულია „S-400“ სახმელეთო-საჰაერო სარაკეტო სისტემების ორი ბატალიონი და 12 ერთეული რუსული „Su-35“-ის ტიპის ავიაგამანადგურებელი. წვრთნები, რომელიც რუსეთის პრეზიდენტ ვლადიმერ პუტინსა და ბელარუსის პრეზიდენტ ალექსანდრე ლუკაშენკოს შორის გასული წლის დეკემბერში მიღწეული შეთანხმების საფუძველზე ხორციელდება, 20 თებერვლამდე გაგრძელდება.