R.T.Әrdoğan: ''Terroru lәnәtlәyirik’’
Türkiyәnin dövlәt başçısı Rəcəb Tayyib Ərdoğan İstanbulda bu gün səhər saatlarında törәdilәn və 11 nəfərin ölümü ilә nәticәlәnәn terror hücumunu lәnәtlәdiyini qeyd edәrәk: ‘‘Terrorla mübarizәmiz qiyamәtә qәdәr davam edәcәk’’ deyib.
R.T.Әrdoğan Haseki xәstәxanasında müalicә olunan yaralılara baş çәkib.
Hadisәni qiymәtlәndirәn Әrdoğan terror aktını törәdәnlәrin әn qisa zamanda tapılacağını deyib.
Türkiyə Böyük Millət Məclisinin sədri İsmayil Kahraman da terror hücumuna görә başsağlığı mesajı yayımlayıb.
Kahraman: ‘‘Millәtimizin dincliyini pozan insanlıq düşmәni qәtillәr hәyata keçirdiklәri hücum ilә xalqımızın özlәrinә qarşı olan nifrәtini daha da artırdı’’ deyib.
Hadisədən sonra Baş nazir Binalı Yıldırım Çankaya Köşkündə Daxili İşlər Naziri Efkan Ala və Səhiyyə Naziri Rəcəb Akdağın da qatıldığı bir təhlükəsizlik toplantısı həyata keçirib.
Baş nazir Binali Yıldırım toplantıdan sonra verdiyi yazılı açıqlamasında: ‘‘Terror bir daha çirkli üzünü göstәrdi’’ deyib.
Terrorla mübarizənin qәtiyyәtlә davam edәcәyini vurğulayan Yıldırım: ‘‘Terror tәşkilatları bәşәriyyәtә düşmәn olduqlarını bir daha göstәrmişdir’’ söylәyib.
Avropa İttifaqı üzrә nazir Ömәr Çәlik isә bu cür xain hücumların vәtәndaş müharibәsi adlandırılmasına qarşı sәrt reaksiya göstәrib.
Ömәr Çәlik: ‘‘Türkiyәdә qanuni qüvvәlәr terrora qarşı mübarizә aparır. Bu mübarizә region ölkәlәri üçün olduğu qәdәr Avropa demokratiyası üçün dә әhәmiyyәtlidir’’ deyib.