Türkiyǝ Rusiya Federasiyasının Suriyadakı hava hücumunu qınayıb

Türkiyǝ Rusiya Federasiyasının bugün sǝhǝr Suriyadakı dinc ǝhaliyǝ qarşı hǝyata keçirilǝn hava hücumunu sǝrt sözlǝrlǝ qınayıb.

Xarici İşlǝr Nazirliyinin açıqlamasında bildirilib ki, Suriyada siyasi hǝll yolunu vǝ qarşıdurmaların dayandırılmasını müdafiǝ edǝn Rusiya Federasiyasının bu ǝsasları tapdaladığı açıqdır.

Açıqlamada hǝmçinin beynǝlxalq ictimaiyyǝtin dǝ vaxt itirmǝdǝn Rusiya vǝ Әsǝd rejiminin bu hücumları qarşısında üzǝrinǝ düşǝni yerinǝ yetirmǝsinin vacibliyi vurğulanıb.

Qeyd edǝk ki, Rusiya ordusuna mǝxsus 3 döyüş tǝyyarǝsinin Suriyanın İdlib şǝhǝr mǝrkǝzinǝ endirdiyi hava zǝrbǝsi nǝticǝsindǝ 23 dinc sakin hǝlak olub, 100-dǝn artıq nǝfǝr isǝ yaralanıb.

İdlibdǝki mülki müdafiǝdǝn mǝsul rǝsmilǝrdǝn Abdurrǝzak Cubeyro Anadolu xǝbǝr agentliyinǝ verdiyi açıqlamada bildirib ki, Rusiya ordusuna mǝxsus döyüş tǝyyarǝlǝri ölkǝnin şimal-qǝrbindǝki müxalifǝtin nǝzarǝtindǝ olan İdlibdǝ Әl-Vatani vǝ İbn Sina xǝstǝxanaları ilǝ yanaşı Әrar mǝscidi vǝ Kusur ilǝ Suvre yaşayış mǝntǝqǝlǝrini bombalayıb.

Rus qırıcılarının şǝhǝrǝ endirdiyi 17 hava zǝrbǝsindǝ ölǝnlǝrin ümumilikdǝ qadın vǝ uşaqlardan ibarǝt olduğu, Әl-Vatani vǝ İbn Sina xǝstǝxanalarının sıradan çıxdığı bildirilib.

Digǝr tǝrǝfdǝn Әsǝdǝ mǝxsus hǝrbi dǝstǝlǝr Lazkiyǝ bölgǝsindǝ yerlǝşǝn Türkmǝndağına quru ǝmǝliyyatı başladıb.

Yerli mǝnbǝlǝrdǝn ǝldǝ edilǝn mǝlumata ǝsasǝn rejim qüvvǝlǝri sǝhǝr saatlarından etirabǝn müxalifǝtin nǝzarǝtindǝki kǝndlǝrǝ top vǝ raketlǝrlǝ atǝş edir.

Qurudan ǝmǝliyyat da başladan rejim qüvvǝlǝri Kǝlǝz vǝ Karaman kǝndlǝrinǝ girmǝk üçün cǝhd göstǝrib.

Müxalifǝtin cavab atǝşi nǝticǝsindǝ yaranan toqquşmalar davam edǝrkǝn, bölgǝdǝki partlayış sǝslǝri Türkiyǝdǝ Hatay vilayǝtinin Yayladağı qǝsǝbǝsindǝn dǝ eşidilir.