Bayden: ""Abrams" tanklarının ilk partiyası gələn həftə Ukraynaya təhvil veriləcək"

ABŞ prezidenti Co Bayden ABŞ-ın ilk "Abrams" tanklarının gələn həftə Ukraynaya təhvil veriləcəyini açıqlayıb.

Bayden və həyat yoldaşı Cil Bayden Ağ Evdə Ukrayna prezidenti Volodimir Zelenski və həyat yoldaşı Yelena Zelenskanı qəbul ediblər.

Ukrayna xalqının göstərdiyi cəsarəti tərifləyən Bayden Rusiya prezidenti Vladimir Putinin Ukraynanı və NATO-nu məhv edə biləcəyi ilə bağlı fikirlərində yanıldığını deyib.

Bayden vurğulayıb ki, Birləşmiş Ştatlar müttəfiqləri və tərəfdaşları ilə birlikdə Ukraynanın ərazisini geri almaq üçün humanitar yardım və hərbi dəstək göstərməyə davam edəcək.

Ukraynanın suverenliyinə və ərazi bütövlüyünə hörmət edən ədalətli və davamlı sülhü dəstəklədikləri mesajını təkrarlayan Bayden Rusiyanın sülhə mane olduğunu və istəsə bu gün müharibəni bitirə biləcəyini qeyd edib.

Co Bayden Rusiyanın bunun əvəzinə İran və Şimali Koreyadan daha çox silah almağa çalışdığını müdafiə eib.

ABŞ-ın Ukraynaya yeni 325 milyon dollarlıq hərbi yardımını açıqlayan Bayden paketə daha çox döyüş sursatı və avadanlıq daxil olduğunu bildirib:

“Gələn həftə ABŞ-ın ilk "Abrams "tankları Ukraynaya çatdırılacaq”. 

Ukraynanın gələcəyi çərçivəsində islahat və maliyyə dəstəyi verəcəklərini açıqlayan Bayden bu ölkəni dəstəkləməyə davam edəcəklərini vurğuladı.

Zelenski də ABŞ-a göstərdiyi köməyə görə təşəkkür edib və məhsuldar görüş keçirdiklərini bildirib.

Ukraynanın müdafiə qabiliyyətinin yaxşılaşdırılması, qış dövründə hava hücumundan müdafiə imkanlarının gücləndirilməsi və taxıl ixracı kimi mövzularda müəyyən addımlar üzərində razılaşdıqlarını ifadə edən Zelenski sülh düsturu üzərində işləməyə davam edəcəklərini qeyd edib.