ABŞ və İtaliya arasında əməkdaşlıq inkişaf etdiriləcək

ABŞ və İtaliya Ukrayna, Çin, mühacirlər və terrorla mübarizə də daxil olmaqla əməkdaşlığı inkişaf etdirəcək.

ABŞ prezidenti Co Bayden və İtaliyanın Baş naziri Ciorcia Meloni Ağ Evdəki görüşdən sonra birgə bəyanatla çıxış ediblər.

Liderlər təsdiq ediblər ki, NATO-nun Vilnüsdə keçirilən Sammiti transatlantik münasibətlərin birliyini və gücünü, eləcə də alyansın çətinliklər qarşısında çəkindirmə və müdafiəni uyğunlaşdırmaq qabiliyyətini nümayiş etdirib.

ABŞ və İtaliyanın BMT Nizamnaməsinə və Ukraynanın suverenliyinə və ərazi bütövlüyünə hörmət edən ədalətli və davamlı sülhə nail olmaq məqsədi ilə Ukraynaya siyasi, hərbi, iqtisadi və humanitar yardımlarını davam etdirəcəklərini vurğulayan liderlər müharibənin enerji və ərzaq təhlükəsizliyi kimi mənfi nəticələrini müzakirə etməyin zəruriliyinə diqqət çəkiblər.

Ukrayna taxılının Qara dənizdən ixracına icazə verilməsinin vacibliyinə diqqət çəkən Bayden və Meloni Rusiyanın Qara Dəniz Taxıl Təşəbbüsündən birtərəfli qaydada çıxmasını pisləyiblər.

İki lider İtaliyanın 2024-cü ildə G7-yə və 2025-ci ildə Ukraynanın Yenidənqurma Konfransına ev sahibliyi etməklə oynayacağı rola toxunaraq, Ukraynanın yenidən qurulmasında daha çox koordinasiyaya söz veriblər.

Aralıq dənizində və onun ətrafında sabitliyin və rifahın təşviqi, o cümlədən terrorun, qeyri-qanuni miqrant axınının və qeyri-sabitliyin əsas səbəblərini aradan qaldırmaq səylərinin həyati əhəmiyyətini vurğulayan liderlər iqtisadi və siyasi çətinliklərlə mübarizə aparan Tunis xalqını dəstəklədiklərini qeyd ediblər.

Bu kontekstdə liderlər ABŞ-ın İtaliyanın miqrasiya, inkişaf və Afrika işlərinə verdiyi dəstəkdən danışıb, ABŞ və İtaliyanın Qərbi Balkanların sabitliyi və təhlükəsizliyinə sadiqliyini bir daha bəyan ediblər.

Tayvan boğazında sabitliyi vurğulayan iki lider Çinin təqdim etdiyi çağırışlar və imkanlar qarşısında çoxtərəfli məsləhətləşmələri gücləndirəcəklərini də dilə gətiriblər.

Liderlər həmçinin DEAŞ-la mübarizə çərçivəsində terrorla mübarizədə təsirli siyasətlər hazırlamaq öhdəliyini təkrarlayıblar.

Texnologiyaların inkişafı, kibertəhlükəsizlik və süni intellekt sahəsində əməkdaşlıqlarını inkişaf etdirəcəklərini vəd edən Bayden və Meloni iqtisadi əlaqələrin gücləndirilməsinin vacibliyini də vurğulayıblar.

Liderlər həmçinin iqlim dəyişikliyi ilə mübarizə, kosmosda tədqiqat və inkişaf, elm və texnologiya və təhsil sahələrində əməkdaşlığın təkmilləşdirilməsinə sadiq olduqlarını dilə gətiriblər.