Avropa İttifaqı qaçqınlarla bağlı böhrana hǝll yolları axtarır

Avropa İttifaqı qaçqınlarla bağlı böhrana hǝll yolları axtarır.
İttifaqa üzv 11 ölkǝ vǝ Balkan ölkǝlǝrinin liderlǝrinin Brüsseldǝ bir araya gǝldiyi yığıncaqda qaçqınların üz tutduğu ölkǝlǝrdǝ 100 min nǝfǝrin yaşaya bilǝcǝyi düşǝrgǝlǝr salınmasına qǝrar verilib.
Yığıncaqda Türkiyǝ ilǝ birgǝ addım atmağın daşıdığı ǝhǝmiyyǝtǝ dǝ diqqǝt çǝkilib.
Yığıncaqdan sonra Avropa İttifaqı Komissiyasının sǝdri Jan Klod Yunker, Almaniya kansleri Angela Merkel vǝ BMT-nin Qaçqınlar üzrǝ Ali Komissarı Antonya Gueteras birgǝ mǝtbuat konfransı tǝşkil ediblǝr.
Yunker sǝrhǝd mǝntǝqǝlǝrindǝ tǝhlükǝsizlik tǝdbirlǝrinin artırılmasının vacibliyinǝ toxunaraq deyib ki, ǝlverişsiz hava şǝraiti qaçqınları çǝtin vǝziyyǝtdǝ qoyub. Yunanıstan vǝ bu istiqamǝtdǝ yerlǝşǝn Balkan ölkǝlǝrindǝ 100 min nǝfǝrin yaşaya bilǝcǝyi düşǝrgǝlǝr salınacaq.
Almaniya kansleri Merkel dǝ böhrana daha yaxşı nǝzarǝt edǝ bilmǝk üçün yaxın zamanda ölkǝlǝr arasındakı koordinasiyanın güclǝndirilǝ bilǝcǝyini vǝ hǝr ölkǝnin bir nǝfǝri bu işǝ cǝlb edǝcǝyini bildirib.
Merkel orta müddǝtli hǝll yolları ilǝ bağlı olaraq Türkiyǝ ilǝ birgǝ işlǝmǝyin daşıdığı ǝhǝmmiyǝti vurğulayıb.
Böhranın hǝlli üçün bütün Avropa ölkǝlǝrinin ǝmǝkdaşlıq etmǝlǝrinin vacibliyini dilǝ gǝtirǝn Gueteras da, bunun bir seçim yox mǝcburiyyǝt olduğunu bildirib.
Yığıncaqda qǝbul edilǝn 17 maddǝdǝn ibarǝt bǝyannamǝdǝ ölkǝlǝr arasında mǝlumat paylanması vǝ ǝlaqǝlǝrin güclǝndirilmǝsi qǝrara alınıb.