İran Atom Agentliyinə qadağa qoydu

  Atom Enerjisi üzrə Beynəlxalq Agentliyin (İAEA - İnternational Atomic Energy Agency) nümayəndələrinin İranın nüvə obyektlərində monitorinq aparmaları qadağan edildi.

  İrana qarşı tətbiq edilən iqtisadi sanksiyalar sərtləşdirildiyi üçün ölkə parlamenti tərəfindən Atom Enerjisi üzrə Beynəlxalq Agentliyi müfəttişlərinin nüvə obyektlərində monitorinq aparmalarının qadağan olunmasına dair qanun qəbul olundu.  Cari ilin yanvarında qəbul olunan qanun fevralın 23-də qüvvəyə mindi.

  Bu barədə İran hökumətinin rəsmisi Əli Rəbbi Tehranda keçirdiyi mətbuat konfransında məlumat verib. O bildirib ki, ABŞ-ın yeni prezidenti sanksiyaları aradan qaldırmalı və üzərinə düşən öhdəliyi yerinə yetirməlidir. Bundan sonra danışıqları davam etdirmək olar.

  İranın Atom Enerjisi üzrə Beynəlxalq Agentliyi yanında daimi nümayəndəsi Kazım Qəribabadi isə deyib ki, qanunun qüvvəyə minməsi rəsmi Tehranın Atom Enerjisi üzrə Beynəlxalq Agentliyi ilə əməkdaşlıq etməyəcəyi anlamına gəlmir. Sanksiyalar 3 ay müddətində aradan qaldırılarsa, İran nüvə obyektləri barədə Atom Enerjisi üzrə Beynəlxalq Agentliyinə lazımi məlumatları verəcək. Əgər sanksiyalar ləğv edilməsə, İran nüvə obyektləri barədə məlumatları heç kimə verməyəcək.