Turkiya Qrimda o‘tkazilgan Davlat dumasiga saylovlarni tan olmaydi
Bu haqda Turkiya tashqi ishlar vazirligi kotibi Tanju Bilgich ma’lum qildi. Uning ta’kidlashicha, Turkiya Ukrainaning hududiy yaxlitligini qo’llab-quvvatlaydi.
Turkiya tashqi ishar vazirligi bayonot berishicha, Qrim yarimorolida Davlat dumasiga bo‘lib o‘tgan saylovlar Anqara uchun yuridik kuchga ega emas, chunki mamlakat yarimorolning Rossiya Federatsiyasiga qo‘shib olinishini tan olgani yo‘q.
"Turkiya Ukrainaning hududiy birligini qo‘llab-quvvatlashda davom etadi va Qrimning noqonuniy anneksiya qilinishini tan olmaydi. Shunga muvofiq, Rossiya Federatsiyasi Davlat dumasiga bo‘lib o‘tgan saylovlar Qrimda ham tashkil etilgani Anqara uchun huquqiy kuchga ega emas", - deyiladi Turkiya tashqi ishlar vaziri matbuot kotibi Tanju Bilgichning mazkur idora saytida e’lon qilgan xabarida.
Qrim Rossiya tarkibiga 2014 yilda referendum orqali qo‘shib olingan. Refrendum natijasiga ko‘ra, 96,77 foiz qrimliklar va 95,6 foiz sevastopolliklar Rossiyaga qo‘shilishi uchun ovoz berdi. Ammo ko‘p davlatlar, jumladan AQSH va Ukraina Qrimni Rossiya tomonidan vaqtinchalik bosib olingan Ukraina hududi, deb hisoblaydi.
Shuningdek, Yevropa Ittifoqi ham Rossiyaning noqonuniy ravishda ishg’ol qilgan Qrimda saylov o’tkazganini qoralab, saylov natijalarini tan olmasligini ma’lum qildi.