Qozog‘iston, Ozarbayjon va O‘zbekiston energetika tizimlarini birlashtiradi

Qozog‘iston, Ozarbayjon va O‘zbekiston energetika vazirliklari rahbarlari Toshkent xalqaro investitsiya forumi doirasida respublikalar energetika tizimlarini o‘zaro bog‘lash bo‘yicha hamkorlik memorandumini imzoladi.

Bu haqda Qozog‘iston Energetika vazirligi matbuot xizmati xabar berdi.

“Imzolangan memorandumning maqsadi Ozarbayjon, Qozog‘iston va O‘zbekiston energetika tizimlarini o‘zaro bog‘lash loyihasini amalga oshirish doirasidagi hamkorlikning asosiy shartlarini belgilashdan iborat”, deyiladi vazirlik xabarida.

Hujjatga ko‘ra, davlatlar Kaspiy dengizi tubi bo‘ylab va boshqa davlatlar hududida yuqori voltli kabel yotqizish orqali energiya tizimlarini ulash imkoniyatlarini o‘rganadi.

Qozog‘iston Energetika vaziri Almasadam Satkaliyevning qayd etishicha, avvalroq Kaspiy dengizi tubi bo‘ylab chuqur dengiz kabelini yotqizish bo‘yicha texnik shartlar loyihasi ishlab chiqilgan.

“Texnik topshiriqlar doirasida xalqaro uzatish yo‘laklarini rivojlantirish (moliyalashtirish, daromadlar oqimi va mulkchilik) hamda Yevropa Ittifoqi mamlakatlariga yashil energiyani sotish bo‘yicha taklif etilayotgan biznes modeli ishlab chiqiladi”, deydi Satkaliyev.

Uning so‘zlariga ko‘ra, loyihani amalga oshirishning asosiy yondashuvlari allaqachon kelishilgan.