türk qehwesi

«türk qehwesi» teyyarlash usuli.

türk qehwesi

türk qehwesi

türkiye awazi radiyosi: gerche ismi «türk qehwesi» bolsimu, lékin türkiye térrotériyeside qehwe ishlepchiqirilmaydu. bu qehwening «türk qehwesi» nami bilen atilishi türkler ijad qilghan özgiche qehwe teyyarlash usuli bilen munasiwetliktur. anadolu rayonigha qehwe tunji qétim 16 – esirde yemendin kirgen. qisqa waqit ichide hemmining yaqturushigha érishkenliktin, keng tarqalghan. gherb dunyasining qehwe bilen yüz körüshüshimu türkler sayisida bolghan. 17 – esirning bashlirida türkiyege kelgen wenediklik sodigerler osmanli impériyeside körgen «türk qehwesi» ni yawropagha élip barghan. deslepte kochilarda sétilghan qehwe 1645 – yili tunji qétim italiyede bir dukanda, yeni chayxanida sétilishqa bashlighan. 18 – esirning deslepki yilliridin étibaren qehwe yawropada keng tarqilishqa bashlighan. qehwening awistiriyege kirish hékayisimu nahayiti heyran qalarliqtur. 1683 – yili wiyanani qorshighan osmanli impériyesi ariyesi meghlub bolup, chékinidu, hemde taghar – tagharlap qehweni arqida qalduridu. awistiriyelikler tagharlardiki qehweni deslepte «haywanlarning yem – xeshekliri» oxshaydu dep oylap qalidu. lékin osmanli impériyesini yaxshi bilidighan jorj kolschitziki bu tagharlarning özige bérilishini telep qilidu, andin u buni desmaye sélip, wiyanada qehwe ichilidighan bir chayxana achidu. shundaq qilip, awistiriyeliklermu qehwe bilen tonushup chiqidu.

16 – esirdin buyan oxshash usullar bilen teyyarlinidighan «türk qehwesi» türklerning  yémek - ichmek medeniyitide  alahide orun tutidu.  jemiyettiki her sahe ammisini ortaq paydida uchrashturidighan qehwe, yene eng muhim ammiwilishish wasiriliridin biridur. biraw bilen birlikte ichilidighan qehwe, kofféinni öz ichige aldighan qehwe renglik ichimliktinmu bekrek ehmiyetke ige. bir piyale qehwe démek, bezide köngüllük söhbet, yene bezide derslishish dégenliktur. «türk qehwesi» texminen 70 millilétriliq kichik piyalilerde ichilidu we adette bu piyaliler ölchem süpitide ishlitilidu.

«türk qehwesi» teyyarlash üchün kéreklik bolghan matériyallar töwendikiche:

  • bir tatliq qoshuqi qehwe parashoki
  • bir qehwe piyalisi su
  • bir tatliq qoshuqi shéker

«türk qehwesi» teyyarlash usuli töwendikiche:

  • aldi bilen, qehwe parashokini qehwe cheynikige qoyung, andin qehwening üstige soghuq su bilen shéker ilawe qiling.
  • qehwe cheynikige qoyulghan qehwe, shéker we su yaxshi arilashturulghandin kéyin, ochaqning üstige qoyung. 
  • asta otta üstidiki köpük yénikkine yuqiri kötürülgenge qeder 3 – 4 minuttek pishurung.
  • qehwe tashay dep qalghan chaghda köpükining bir qismini piyalige töküng. chünki qehwe qanche köpüklük bolsa shunche yaxshi teyyarlanghan bolidu.
  • qehwe cheynikini qaytidin ochaqning üstige qoyup, qaynighan chaghda piyalige tökkendin kéyin, bir istakan su we türk loqumi bilen birlikte istémal qilsingiz bolidu.


مۇناسىۋەتلىك خەۋەرلەر