özbékistan rusiyedin bashqa döletlerge köplep ishchi chiqirishqa yüzlendi
özbékistan türk jumhuriyetliri puqralirining rusiye ayrodurumliri we quruqluq chégra éghizlirida saqlitip qoyuluwatqanliqi toghrisidiki xewerler köpiyiwatqan bir waqitta, ereb döletlirige emgek küchi éksport qilishqa tirishmaqta.
türkiye awazi radiyosi xewiri: seudi erebistan özbékistan perghane ölkisining bashliqi xeyrullo bozorowning jidde shehirdiki ziyariti jeryanida tüzülgen kélishim boyiche, 100 ming ishchi qobul qilidu.
perghane ölkisining bashliqi xeyrullo bozorowning bashchiliqidiki wekiller ömiki seudi erebistanda yashawatqan milliti özbék bolghan we igilik tikleshte muweppeqiyet qazanghan karxanichilar bilen uchrashqan.
bildürülishiche, özbék wekiller ömiki «Vision Ambassadors» we «Bahra Electrics» shirketliri bilen körüshüp, özbékistanda baqmichiliq, mis pishshiqlap ishlesh we éléktir simi ishlepchiqirishqa munasiwetlik türlerni emelge ashurushni pilan qilghan.
buningdin bashqa yene, özbék wekiller ömiki uchrishishlirida, özbékistanda ereb tili kurslirini échish, oxshimighan kesipler boyiche terbiyelesh kurslirini échish we özbékistan puqralirining seudi erebistanda uzun muddetlik ishqa orunlishish mesililirini muzakire qilghan.
özbékistan yanwarda (2024) qatar bilenmu buninggha oxshash kélishim imzalighan idi.
köchmen ishchilar aililirige ewetidighan pul, özbékistan iqtisadining muhim bir qismini igelleydu. 2022-yili özbékistanning buningdin qilghan kirimi 16.7 milyard dollargha yetken bolup, bu ichki ishlepchiqirish omumiy qimmitining %21 ge toghra kélidu.
pirézidént shewket mirziyayéw perman chüshürüp, tashqi emgek küchi köch idaresining hoquqini kéngeytti. perman boyiche, engliye, gérmaniye, latwiye, polsha, wéngiriye, yaponiye we ereb birleshme xelipilikide turushluq özbékistan elchixanilirida emgek küchlirige toghra yétekchilik qilish meqsitide meslihetchiler turghuzulidu.
