obérjinler awstraliyege mölcherlenginidin 18 ming yil burun kelgenmu?

türkiye awazi radiyosi xewiri: arxiologlar obérjinlerning awstraliyege mölcherlenginidin 18 ming yil burun kelgen bolushi mumkinlikige alaqidar melumatlargha érishti.

xelqaraliq tetqiqatchilar awstéraliyening shimalidiki madjédbebe qiyaliqliri astida élip barghan qizip tekshürüshliri jeryanida qolda yasalghan boyumlarni tépip chiqti.

bu boyumlarni tekshürgen tetqiqatchilar buning eng az dégendimu 65 ming yilliq tarixqa ige ikenlikini, shundaq bolghanda awstraliyening yerlik xelqi hésablinidighan obérjinlerning mölcherlenginidin 18 ming yil burun awstraliyege kelgen bolidighanliqini bildürdi.

washingiton unwérsitéti insanshunasliq ilimliri piroféssori bén marwik, buningdin ilgirimu awstraliyege kelgen tünji insanlarning 47 ming yildin 60 ming yilghiche tarixqa ige ikenlikige ishinidighanliqini bildürgen idi.

piroféssor bén marwik, «awstraliyege tünji insanlar kélishi bilen teng bu yerde yashaydighan «mégafuna» depmu atilidighan chong kangirolar, xaltiliq éyiqlar we tash paqilarning neslining 45 ming yil burun yoqilishigha seweb bolghan» dégen texminlerning xata ikenlikini tekitlep: «bu yéngi tépilghan tarixiy boyumlar, insanlarning tebiitini özgertip, «mégafuna» (chong kangiro)larning nesilini tügetkenlikige dair köz qarashlarni inawetsiz halgha keltüridu. bu yéngi melumatlar insanlarning haywanlar bilen birlikte yashighanliqi heqqide yéngi pikirlerni otturigha qoyidu» dédi. 

tetqiqatchilar bu qétim tépilghan qolda ishlengen boyumlar arisida dunya boyiche eng qedimi palta barliqi we buning deslepki insanlarning uruq tirighanliqigha we tiriqchiliq qilghanliqigha alamet bolalaydighanliqini tekitlidi. 

buningdin bashqa yene tépilghan  boyumlar arisidiki renglik mom qelemningmu insanlar teripidin senet we sémwol xaraktirliq boyash ishliri üchün ishlitilgen bolushi mumkinliki bildürüldi.

tetqiqatlarning tenijisi «Nature» zhornilida élan qilindi.