xan sariyida chong bolghan peyghember

türkiye awazi radiyosi: burunning burunisida pirewn welid isimlik zalim padishah ötkenidi. u bir kéchisi chüshide quddus tereptin kelgen chong bir ot kördi. bu ot pütkül misirliqlarning öylirini köydürüp tashlighan bolsimu, biraq israil oghullirining öylirige chéqilmidi.

 pirewn etisi etigen derhal barliq sihirgerliri we palchilirini sariyigha yighip ulargha:

-  manga derhal bu chüshning tebirini yéship béringlar, - dédi. sihirgerler chüsh heqqidiki pikirlirini pirewnge mundaq bayan qilishti:

- israil oghulliri ichide bir ayal pat yéqinda bir oghul tughidu. u oghul silini we padishahliqlirini yoq qilidu. buni anglighan pirewnning közi qangha toldi we derhal eskerlirige israil oghulliri ichide yéngi tughulghan barliq oghul bowaqlarni qetl qilishqa buyruq chüshürdi. pirewnning eskerliri uning buyruqini ijra qilishqa tutush qildi.

mushundaq qorqunchluq we wehimlik künlerning biride israil oghulliri ichide allahqa chin qelbidin ishinidighan bir mumin ayal musa isimlik bir oghul tughdi. ana pirewnning zulmidin ensirep oghli musani qandaq yoshurush heqqide bash qaturdi.

allah taala musaning anisigha: «bu bala kelgüside peyghember bolidu. bu seweblik sen balangni bir sanduq ichige sélip, nil deryasigha qoyuwetkin, uning suda gherq bolushidin qetiy ensirimigin. chünki uni sanga qayturup bérimen», dep xush xewer berdi.

musaning anisi allahning buyruqigha binaen oghlini sanduqqa sélip nil deryasigha qoyup berdi. su dolqunliri bu sanduqni pirewnning xan ordisi terepke qarap éqitip mangdi, musaning achisimu sanduqning izidin qoghlap mangghan idi. sanduq xan ordisigha kelgende toxtidi.

 del shu waqitta bir chakar sanduqning ichide bir bowaqning barliqini körüp chöchüp ketti we derhal xanishning qéshigha qarap yügürdi. asiye isimlik xanish dindar we aq köngül ayal idi. bowaqni körgen xanishning qelbi hayajandin titrep öz - özige: «bu balini yaxshi körmeslik mumkinmu?» dégech musani pirewnning qéshigha élip mangdi.

pirewnning bowaqni sarayda élip qalghusi yoq idi. shundaqtimu xanish bowaqni yénida élip qélip öz balisidek qaridi. bowaq héchkimning sütini emgili unimaytti. teqdirning chaqpiliki musaning anisini pirewnning xan ordisigha élip keldi. kichik musa anisini qanghuche emdi. shundaq qilip, ana - bala bir yerge jem boldi. shundaqla allah taala musaning anisigha bergen wedisini ishqa ashurup, uni oghli bilen jem qildi.

aridin uzun yillar ötti. musa eleyhissalam nahayiti zirek, qamlashqan yigit bolup qalghan idi. bir küni sirtqa chiqti. kochida ikki kishining jédel qiliwatqanliqini kördi. bekrek bozek bolghan kishige yardem qilmaqchi bolghan musa eleyhissalam, qarshi terepke bir musht atqan idi, u kishi yerge yéqilip ikkinchilep ornidin turalmidi.

buningdin xewer tapqan pirewn musa eleyhissalamni ölüm bilen jazalashni qarar qildi. pirewnning niyitini bilip qalghan musa eleyhissalam sheherni tashlap medyen shehirige ketti. musa eleyhissalam bu yerde yashanghan bir moysipit kishining qoylirini baqti, bu moysipit kishining qizliridin biri bilen öylinip baliliq boldi. musa eleyhissalam medyende on yil yashighandin kéyin bala - chaqilirini élip misirgha qaytip kétishni qarar qildi. payansiz chöl - jezirilerdin kéchip ming bir musheqette tur téghigha yéqin jaygha jaylashqan tuwa wadisigha yétip keldi. 

kéche bolup ketken idi, her terepni qarangghuluq perdisi qaplap ketti, bir tereptin qattiq yamghur yaghsa, yene bir tereptin, shiddetlik chaqmaq chéqiwatatti. musa eleyhissalam néme qilishini bilelmey téngirqap qalghanidi. del shu chaghda bir taghning étikide köyüwatqan otni körüp qaldi. u ayaligha: «bu jayda saqlap turghin! u terepte ot körüwatimen. belkim qeyerde ikenlikimizni biliwalsam ejep emes, yaki bolmisa bizni issitidighan bir nechche parche otun taparmen» dep nur terepke qarap yügürdi.

musa eleyhissalam nur bar yerge yétip keldi. bu asman bilen zémin otturisida turidighan we közlerni qamashturidighan küchlük nur idi. allah taala shu chaghda musa eleyhissalamgha nida qildi:

- ey musa! men alemlerning perwerdigari allah bolimen. séni peyghemberlikke tallidim. bu awazni anglighan musa eleyhissalamning yüriki yérilip kétey, dep qaldi. bir azdin kéyin eslige kelgen musa eleyhissalam:

_ ya rebbim! hazir anglighan awaz séningmu, yaki perishtiliringdin biriningmu?,- dédi. allah atala:

_ sanga nida qiliwatqan men séning perwerdigaring bolimen, hazir sen zalim pirewnning qéshigha barghin we sanga ata qilghan möjizilirim bilen uninggha buyruqlirimni yetküzgin, - dep musa eleyhissalamgha wezipe tapshurdi.

bu qissidin shuni körüwélishqa boliduki, allah muhapizet qilghan kishini héchkim yoq qilalmaydu. shundaqla allah yoq qilmaqchi bolghan kishini héchkim qoghdap qalalmaydu. allah özinige semimiy halda yölinip ishgengüchilerge choqum nusret ata qilidu.