hesetxorluq we töhmet qurbani

türkiye awazi radiyosi: aldinqi pirogrammimizda bayan qilinghinidek, yaqub eleyhissalamning 12 oghli bar idi. yaqub eleyhissalam oghulliri ichide yüsüfni alahide yaxshi köretti hem bekla etiwarlaytti, uning yüsüfke bolghan mihri - muhebbiti bilinipla turatti. bir küni yüsüf ajayip bir chüsh kördi. chüshini derhal atisi yaqub eleyhissalamgha éytip berdi. chüshide on bir yultuz, quyash we ay uning aldida hörmet bilen uninggha sejde qilghan idi.

 yaqub eleyhissalam oghlining körgen chüshi üstide nahayiti uzun oylandi, u oghli yüsüfke allahning katta németlerni ata qilidighanliqini we oghlining meshhur shexs bolidighanliqini hés qildi. shunga, bashqa oghullirining ichi tarliq qilip yüsüfke ziyankeshlik qilishidin endishe qilishqa bashlidi. u  yüsüfni bir chetke tartip mundaq dédi:

_ y jan - jiger oghlum! körgen chüshüngni hergiz akiliringlargha éytmighin, chünki sen nahayiti xeyrlik chüsh körüpsen, nawada akiliring chüshüngdin xewer tépip qalsa, sheytangha egiship sanga ziyankeshlik qilip sélishi mumkin, dédi.

aridin anche uzun ötmey yaqub eleyhissalam ensirigen ishlar yüz berdi. yüsüfning akiliri uning chüshidin xewer tépishti. shuningdin kéyin, yaqub eleyhissalamning etiwarliq oghli yüsüfni téximu qizghinishqa bashlidi. ularning ichidiki heset oti waqitning ötüshige egiship nepretke aylinip ketti. emdi ular yüsüfni yoq qilishning koyigha chüshti.

ular pada baqatti, lékin bu ishni peqetla xalap qilmaytti, daim dégüdek atisining déginining eksini qilatti, wediside turmaytti. ular atisining yüsüfni etiwarlishini könglige peqetla sighduralmay, héssiyatlirini chandurup qoyghili turdi. ular yüsüfni yoq qilishni alliqachan könglige püküp bolghanidi.

 bir küni ular atisi yaqub eleyhissalamning huzurigha kirip, inisi yüsüfni sirtqa oynatqili élip chiqqusi barliqini, shunga özlirige ruxset bérishini ötünüshti. yaqub eleyhissalam bir kün ilgiri bir chüsh körgen idi, chüshide on börining yüsüfni yémekchi bolghanliqini, biraq bir börining buninggha tosalghu bolghanliqini körgenidi. bu sewebtin yüsüfning sirtqa chiqishigha köngli qoymaytti. shunga u chong oghullirining yüsüfke ziyankeshlik qilishidin ensirep etey ruxset bermey turuwaldi we oghullirigha mundaq dédi:

_ siler özara oynap, yüsüfni untup qélishinglar mumkin, bu waqitta böre kélip uni yéwetse qandaq qilisiler. buni anglighan oghulliri derhal jawab qayturup:

_ sanimiz intayin köp tursa, böriler yénimizgha qandaqmu kélelisun, uning üstige yüsüfni yaxshi köridighan tursaq, - déyishti. yaqub eleyhissalam oghullirining sözini anglap, könglide razi bolmisimu yenila yüsüfni ulargha qoshup qoyushqa maqul boldi. yüsüf shu chaghda 17 yashqa kirgenidi.

ular yolgha chiqishti, chölning bir yérige kelgende yüsüfning akiliri epti - beshrisini ashkarilashti, ular yüsüfni urushqa bashlidi, arqidin yüsüfni kötürüp aghzi kichik, ichi keng bir quduqqa tashliwetti. yüsüf quduqning ichige zexme yémestin chüshkenidi, quduqning tamliri téyilghaq bolghachqa yamiship sirtqa chiqish mumkin emes idi. shunga yüsüf quduqning ichidiki bir tash üstide olturup ghemge patti, u sewrchanliq bilen kütüshke bashlidi, u jasaritini qilchimu yoqitip qoymay allahqa dua qilip yardem telep qildi. deslep qorqqan yüsüf kéyinche allahning yardimi bilen qorqmaydighan boldi. chünki, allah uningdiki barliq ghem - ghuse we qayghularni kötürüwetkenidi.

yüsüfning akiliri uni quduqqa tashliwetkendin kéyin, bir öchke boghuzlap, qénigha yüsüfning könglikini chilap atisi yaqub eleyhissalamning aldigha yalghandin yighlamsirap kélishti, ular nahayiti qayghuluq halda:

_ ata! yüsüfni böre yep ketti, - déyishti. yüsüfni tolimu yaxshi köridighan yaqub eleyhissalam buni anglap közliri qarangghuliship ketti, yüsüfning hesiritidin künlerche közliridin yash toxtimidi.

yüsüf üch kündek quduqning ichide turup qaldi. yüsüfning hammisining bir oghli bar idi, yüsüfning akiliri uni quduqqa tashliwetkende, umu ashu melunlarning qéshida idi. u yüsüfning ölüp kétishini peqet xalimaytti. shunga, yüsüf quduqtiki chéghida quduqning qéshidin ketmey yüsüfke yeydighan nerse tashlap berdi.

 aridin üch kün ötkendin kéyin, shamdin misirgha qarap yolgha chiqqan bir karwan quduqqa yéqin bir jaygha aram élish üchün chüshti. karwandikilerdin biri quduqtin su tartish üchün chélikini quduqqa tashlidi. chéliki éghirliship ketkenliktin, chélekni chiqirishqa yalghuz küchi yetmey qaldi, shundaqtimu küchep chélekni ming teslikte chiqardi, biraq aldidiki menzirini körüp közlirige ishinelmey qaldi. chélekte shundaq qamlashqan, nur yüzlük we güzel chihirlik bir yigit turatti.

karwandikler yüsüfni yénigha élip misirgha apardi. ular bu qamlashqan balini bay birsige köprek pulgha sétiwétip pul ündürüshni könglige püküshti. ular yüsüfni qul bazirigha élip bérishti. shu küni qul bazirigha misirning xezine ishliri naziri kutfirmu kelgenidi. u yüsüfning chirayini körüp heyran qaldi. u qilche ikkilenmey yüsüfni chakar qilish üchün sétiwaldi. kutfir bighubar, edeb - exlaqliq we yaxshi mijezlik bu balini ayalining yénigha élip kirip mundaq dédi:

_ bu baligha obdan qarighin we yaxshi muamile qilghin. chünki, u nahayiti eqilliq yaxshi balidek qilidu, uni belkim bala qiliwalarmiz.

shundaq qilip, allah yüsüfni chet bir jaydiki yézidin eyni waqitta eng tereqqiy qilghan awat bir sheherge we aliy menseblik birining öyige orunlashturghan idi.

buningdin körüwélishqa boliduki, bir kishi peyghember bolghan teqdirdimu eng yéqin kishilirining ziyankeshlik qilishigha uchrishi mumkin. emma insan heqiqeten allahni yaxshi körüp, uninggha chin qelbidin ishinip tewekkül qilsa, allah u insangha choqum yardem qilidu. uni qarangghu quduqlardin qutquzup xiyalmu qilip baqmighan güzel yerlerge yetküzüshi mumkin. allah hemmige qadir bolup, héchqandaq ish uninggha qiyin emes.

yüsüf eleyhissalam xojayini kutfirning sariyida bir nechche yil ishlidi, bu mezgilde u allahqa shükür qildi hemde uninggha tesbih éytishni izchil dawamlashturdi.

bir küni kutfirning ayali bilen yüsüfning otturisida mesile kélip chiqti, ismi zuleyxa bolghan bu ayal mesilini chongaytip, yüsüfning özige yaman niyette bolghanliqini éytip yüsüfke bohtan chaplidi, buningliq bilenla boldi qilmay, éri kutfirdin yüsüfni zindangha tashlatquzushni telep qildi, kutfirmu ayalining telipige binaen yüsüfni zindangha tashlatquzdi.