ب د ت تۈركىيەنىڭ ئىقتىسادىي تەرەققىيات مۆلچەرىنى ئۆستۈردى

تۈركىيە ئاۋازى رادىيوسى خەۋىرى: بىرلەشكەن دۆلەتلەر تەشكىلاتى سودا ۋە تەرەققىيات كونفېرانسى دۇنيا ئىقتىسادىغا مۇناسىۋەتلىك دوكلاتىنىڭ ئۆكتەبىر سانىنى ئېلان قىلدى.

دوكلاتتا بىلدۈرۈلۈشىچە، دۇنيا ئىقتىسادىنىڭ ئېشىش سۈرئىتى بۇلتۇر %3 بولۇپ، 2023-يىلى ئاستىلاپ %2.4 كە تۆۋەنلەيدىكەن.

بىرلەشكەن دۆلەتلەر تەشكىلاتى سودا ۋە تەرەققىيات كونفېرانسى دۇنيا ئىقتىسادىغا مۇناسىۋەتلىك دوكلاتىنىڭ ئاپرېل سانىدا، دۇنيا ئىقتىسادىنىڭ بۇ يىلقى ئېشىش سۈرئىتىنىڭ %2.1 بولىدىغانلىقى مۆلچەرلەنگەنىدى.

بىرلەشكەن دۆلەتلەر تەشكىلاتى سودا ۋە تەرەققىيات كونفېرانسىنىڭ دوكلاتىدا، 2023-يىلى تۈركىيەنىڭ ئىقتىسادىي تەرەققىيات مۆلچەرى %2.6 تىن %3.7 كە ئۆستۈرۈلدى. ئامېرىكا قوشما ئىشتاتلىرىنىڭ بۇ يىلقى ئىقتىسادىي تەرەققىيات مۆلچەرى بولسا %0.9 تىن %2 كە ئۆزگەرتىلدى.

دوكلاتتا، ياۋروپا ئىتتىپاقىنىڭ ئىقتىسادىي تەرەققىيات مۆلچەرى %0.4 كە، خىتاينىڭ ئىقتىسادىي تەرەققىيات مۆلچەرى %4.6 گە، گېرمانىيەنىڭ ئىقتىسادىي تەرەققىيات مۆلچەرى %0.6 گە چۈشۈرۈلدى.