كىرودىيە 2023-يىلى ياۋرونى پۇل بىرلىكى قىلىپ ئىشلىتىشنى باشلايدۇ

تۈركىيە ئاۋازى رادىيوسى خەۋىرى: ياۋرو گۇرۇپپىسىنىڭ باشلىقى ۋە ئىرېلاندىيە مالىيە مىنىستىرى پاسچال دونوخو ياۋروپا ئىتتىپاقى مالىيە مىنىستىرلىرىنىڭ لىيۇكسېمبۇرگدا ئۆتكۈزگەن ياۋرو گۇرۇپپىسى يىغىنىدىن كېيىن، بايانات ئېلان قىلدى.

ئۇ كىرودىيە ئىقتىسادىنىڭ ياۋروغا قېتىلىش ئۈچۈن زۆرۈر شەرتلەرنى ھازىرلىغانلىقىنى بىلدۈرۈپ، ياۋروپا كومىتېتى ۋە ياۋروپا مەركىزىي بانكاسىنىڭ دوكلاتلارنى مەمنۇنلۇق بىلەن قوبۇل قىلغانلىقىنى ئەسكەرتتى.

ئۇ: «ياۋرو گۇرۇپپىسى بولۇش سۈپىتىمىز بىلەن، كىرودىيەنىڭ ياۋرو ئائىلىمىزنىڭ 20-ئەزاسى بولۇشىنى تەۋسىيە قىلدۇق. كىرودىيەنىڭ 2023-يىلى 1-يانۋاردىن باشلاپ ياۋروپا پۇل بىرلىكىنى ئىشلىتىشكە ئۆتۈشىنى كۈتىمىز» دېدى.

كېلەر ھەپتە بېلگىيە پايتەختى بىريۇسسېلدا ئۆتكۈزۈلىدىغان ياۋروپا ئىتتىپاقى باشلىقلار يىغىنىدا، كىرودىيەنىڭ ياۋرو پۇل بىرلىكىنى ئىشلىتىشكە ئۆتۈشىنىڭ تەستىقلىنىشى كۈتۈلمەكتە.

ياۋرو رايونى ھەققىدە

گېرمانىيە، فىرانسىيە، ئىتالىيە، ئىسپانىيە، گوللاندىيە، ئاۋستىرىيە، بېلگىيە، فىنلاندىيە، ئىرېلاندىيە، لىيۇكسېمبۇرگ ۋە پورتۇگالىيە قاتارلىق دۆلەتلەر 1999-يىلى يانۋاردا ياۋرونى پۇل بىرلىكى قىلىشنى باشلىغان بولۇپ، ياۋرو ۋە ياۋرو تەڭگىلىرى بازارغا چىقىرىلغان ئىدى.

دەسلەپتە 11 دۆلەت ئورتاق پۇل قىلىپ ئىشلەتكەن ياۋرو، 2001-يىلى گىرېتسىيە، 2007-يىلى سىلوۋېنىيە، 2008-يىلى جەنۇبىي قىبرىس رۇم ھاكىمىيىتى، 2009-يىلى مالتا ۋە سىلوۋاكىيە، 2011-يىلى ئېستونىيە، 2014-يىلى لاتۋىيە، 2015-يىلى لىتۋانىيە تەرىپىدىن پۇل بىرلىكى سۈپىتىدە قوبۇل قىلىندى.

ياۋرو دوللاردىن قالسىلا دۇنيادا ئەڭ كۆپ ئىشلىتىلىدىغان پۇل بىرلىكى دەپ قارىلىدۇ.