erdoghan: 2017 – yili türkiye iqtisadining sekrep ilgirilesh yili bolidu
jumhur reis rejep tayyip erdoghan, musteqil soda – sanaetchiler jemiyitining xalich qurultay zalida ötküzülgen yighinida söz qilip, 2017 – yilining türkiye iqtisadining sekrep ilgirilesh yili bolidighanliqini éytti.
türkiye awazi radiyosi xewiri: soda – sanaetchilerge barliq imkaniyet we jasaritini mujessemleshtürüp meblegh sélishni kücheytishke chaqirghan erdoghan, «ishlepchiqiringlar, éksportni kücheytinglar, emgek pursitini kéngeytinglar. mushundaq qilip silermu payda élinglar, dölitimizmu payda alsun» dédi. u, istanbul pay chéki baziridiki örlesh, dollardiki töwenlesh, aq renglik buyum sétish nisbitidiki örlesh we bazarning türkiye iqtisadigha bolghan ishenchisining toluq ikenlikige isharet qilidighanliqini qeyt qildi.
iqtisad charqining barghanche téz aylinishqa bashlighanliqini eskertken erdoghan, «pütkül soda – sanaetchilirimizge chaqiriq qilimen؛ dölitimizge ehmiyet bersek, dölitimizni söyidighan bolsaq, bu zéminlargha bolghan borchimizni ada qilmaqchi bolsaq, mana bu heriketke ötidighan chaghdur. téximu köp ishleymiz» dégenlerni qeyt qildi.
süriyediki özgirishler we amérikining bölgünchi térrorluq teshkilati p k k ning suriye gumashtisi y p g gha qilghan qoral yardimi toghrisidimu toxtalghan erdoghan, bir térrorluq teshkilatini yéngish üchün bashqa bir térrorluq teshkilatini qollashning xata ikenlikini amérikigha qayta – qayta chüshendürgenliklirini éytti. u, eger y p g unsurliri türkiyege tehdit peyda qilsa, héchkimdin sorap olturmastin kéreklik qedemlerning tashlinidighanliqini yene bir qétim tekitlep, «jerablusta, raida, babta térrorgha qarshi öz qedimimizni qandaq tashlighan bolsaq, buningdin kéyinmu kéreklik qedemni tashlaymiz» dédi.
türkiyening ichide dawamlashturuluwatqan térrorchilargha zerbe bérish herikiti toghrisidimu toxtalghan erdoghan, «dölet ichide p k k térrorluq teshkilatigha qarshi tariximizning eng ünümlük zerbe bérish heriketlirini élip barduq, bériwatimiz. özliriche bu yil yaz mezgilide chong weqelerni peyda qilishqa teyyarliniwatqan térrorluq teshkilatigha ular yoshurunghan taghlarni tar qilduq. uwilirigha kirimiz dégeniduq, qanchiliq térrorluq teshkilati bolsa, hemmisining uwisigha kirduq, kiriwatimiz. öchirette turuwatqanlar bar, ularghimu kirimiz» dédi.
