türk we iran shirketliri 3 türlük kélishim tüzdi

türkiye awazi radiyosi xewiri: iranning paytexti téhranda ötküzülgen imza murasimigha, türkiye terepke wekaliten mafin west guruhining diréktori firat yilmaz, iran terepke wekaliten shashta guruhi bash diréktori seyyid riza newruzzada bilen hurremshehir parlamént ezasi abdullah samiri ishtirak qildi.

kélishim, 10 milyon dollar qimmitidiki qoshma yoluchilar paraxotining sétilishi, 70 milyon dollar qimmitidiki saba soda binasining türk qurulush shirkiti teripidin sélinishi, iranning hurremshehir shehiridiki arwandan rayonida 15 milyon dollar qimmitidiki paraxot yasash we rémunt qilish muessesesining türk shirkiti teripidin höddige élinishini mezmun qilidu.

mafin west guruhining diréktori firat yilmaz murasimda qilghan sözide, iran bilen türkiyening oxshimighan sahelerdiki soda munasiwetlirini tereqqiy qildurup, iranning türkiye we yawropa bazarlirigha échilidighan ishiki bolushni nishan qiliwatqanliqlirini éytti.

shashta guruhi bash diréktori seyyid riza newruzzada, néfit ximiyesi, balon ishlepchiqirish qatarliq özliri éhtiyajliq bolghan bashqa sahelerdimu türk shirketliri bilen hemkarliq ornitishni xalaydighanliqlirini qeyt qildi.

hurremshehir parlamént ezasi abdullah samiri paraxot yasash muessesesining hurremshehirde ishqa ashurulushining nahayti zor ehmiyetke ige ikenlikini tekitlep mundaq dédi: «hurremshehir paraxot yasashqa tolimu bab kélidighan bir sheher. hurremshehir xelqi bolush süpitimiz bilen bu muhim kélishimge alahide ehmiyet bérimiz hem qollaymiz.»