adalet we tereqqiyat partiyesining yéngi basquch yol xeritisi

türkiye awazi radiyosi: adalet we tereqqiyat partiyesining 21 – mayda ötküzülgen 3 – nöwetlik chong qurultiyida jumhur reis erdoghan, qurghuchisi bolghan partiyege qaytidin bashliq bolup saylandi. bu qurultay bilen birlikte, türkiye siyasiy hayatida yéngi bir basquchqa qedem qoyulghan boldi. bu basquchta «démokratiye, özgirish, islahat» qatarliqlar asasiy pirinsip qilinghan bashqurush tüzülmisini yaqlaydighanliqini élan qilghan adalet we tereqqiyat partiyesi, hakimiyet béshidiki 15 yilini arqida qaldurup, kélechekning yol xeritisining asasinimu yaratqan boldi.

yéqinqi 15 yilda türkiyede iqtisadtin sehiyegiche, maariptin üstqurulmighiche köpligen sahelerde islahatlar élip bérildi؛ islahat élip bérilghan sahelerdiki özgirishler sayisida türkiye iqtisadiy muhim utuqlarni qolgha keltürdi.

yene bir tereptin, türkiye adalet we tereqqiyat partiyesi hökümetliri mezgilide yeni yéqinqi 15 yilda milliy kirimni 3 hessige yéqin ashurup, dunya iqtisadining muhim bir aktiyori bolush yolida körünerlik qedemlerni tashlidi. türkiye iqtisadida bésip ötülgen ilgirileshler we nöwettiki ehwalni bir utuq hékayisi, dep atash xata bolmaydu.

adalet we tereqqiyat partiyesidin kötülüwatqan ishlar

jumhur reis erdoghanning adalet we tereqqiyat partiyesige yéngidin eza bolushidin tartip saylam ötküzülidighan 2019 – yilighiche bolghan bu musapide adalet we tereqqiyat partiyesi teripidin her xil siyasetler we yol xeritilirining otturigha qoyulushi kütülmekte. bolupmu 15 – iyul herbiy – siyasiy özgirish qozghashqa urunush herikitining zerbe nishanigha aylanghan makro iqtisadiy muqimliqning muhapizet qilinishi we küchlük tereqqiyat süritini qolgha keltürüsh üchün, bu siyasetler nahayiti muhim hésablinidu.

siyasette muqimliq kapaletke ige qilinidighan bu yéngi basquch bilen birlikte türkiyede, xususen birleshme hökümetler dewrlirining mehsuli bolghan iqtisadiy kirizislar arqida qaldurulup, iqtisadiy muqimliqqa merkezlishish pursiti qolgha keltürülidu. bu nuqtidin qarighanda, yéngi basquch iqtisadiy éshish we tereqqiyat süritini ashurmaqchi bolghan türkiye üchün muhim pursetlerni élip kélidu.

aldimizdiki bu musapide kirimi ottura hal eller guruppisidin chiqip kirimi yuqiri eller sépige qétilish üchün, qurulmiliq islahatlargha merkezlishish we saheler boyiche qilinidighan xizmetlerning kücheytilishi zörür. mesilen, xizmet imkaniyiti yaritish saheside élip bérilidighan islahatlarning ishsizliq nisbitige biwasite tesir körsitidighanliqi éniq. bu dairide birinchi bolup ishsizliq nisbitide achquchluq rol oynawatqan yashlar we ayallarning ishqa orunlashturulushining kücheytilishi aldinqi qatardiki muhim ishlarning biri bolidighandek qilidu. yene, ishlepchiqirish saheside qurulmiliq özgirish élip bérip, qoshumche qimmiti yuqiri mehsulat ishlepchiqirishqa we éksport sanliq melumatlirining yuqiri kötürülüshige merkezlishishi kütülmekte. bu sayida tashqi sodida téximu paal bir musapige qedem qoyidighan türkiyening tashqi soda qizil reqimidimu yaxshilinish körülüshi mumkin.

türkiye pursetni qoldin bermey, téxnologiye barliq sahelerde nahayiti yuqiri süret bilen tereqqiy qiliwatqan dunyawi sistémining bir parchisigha aylinishi kérek. iqtisadiy muqimliq asas qilinghan, küchlük riqabet muhitida éshish nishan qilinghan istratégiyeler, türkiyening xelqara bazarlarda téximu küchlük aktiyorgha aylinishida nahayiti muhim rol oynaydu.

türkiye özi jaylashqan rayondiki xewpsizlik mesililiri we duch kelgen herbiy – siyasiy özgirish qozghashqa urunush herikiti dégendek qiyinchiliqlargha qarimay, 2016 – yilining axirida %2.9 lik iqtisadiy éshishni qolgha keltürdi. tereqqiy qiliwatqan döletlerning biri bolghan türkiye, bu sharaitta téximu ishenchlik we saghlam qedemlerni tashlash we iqtisadning kélechikige alaqidar endishlerni bir terep qilishta jumhur reislik tüzümining muhim pursetlerni béghishlaydighanliqini texmin qilmaqta.

jumhur reis erdoghan qurghuchisi bolghan partiyening bashliqi bolghan bu yéngi basquch bilen birlikte, siyaset we iqtisadta turghunluqqa yaki chékinishke seweb bolidighan köpligen tosqunluqlarning bir terep qilinishi nishan qilinmaqta. siyasiy jehette küchlük bir türkiye, iqtisadi muqimliqning achquchinimu qoligha alghan bolidu. démek, nöwette iqtisadta sijil we keng dairilik éshishni qolgha keltürüsh nishanlirigha yétidighan we chet el sélinmiliri sanida éshish körülidighan yéngi bir dewrning harpisida turmaqtimiz.

yéngi tüzüm bizge islahat we özgirish élip kélidighan yéngi bir türkiyening ishiklirini achidu. bu jehette otturigha qoyulghan siyaset we istratégiyeler orundalghan teqdirde, hem siyaset hem iqtisadiy muqimliq muhapizet qilinghan hem xelqning bayashatliqi barghanche yaxshilanghan bir türkiyening uli sélinghan bolidu.