türkiye özining yerlik aptomobilini 2019-yili bazargha salidu

türkiye awazi radiyosi xewiri: bilim, sanaet we pen-téxnika ministiri faruq özlü jumhur reis rejep tayyip erdoghanning türkiye soda-sanaetchiler birleshmisining 73-nöwetlik omumiy kéngesh yighinida otturigha qoyghan yerlik aptomobil toghrisida toxtaldi. u yerlik aptomobil ishlepchiqirish nishanlirining 2019-yilda tunji modélini otturigha chiqirish ikenlikini éytti.

jumhur reis rejep tayyip erdoghanning bundin bir qanche yil burun «türkiyede yerlik markida aptomobil ishlepchiqiridighan yigit izdewatimen» dep chaqiriq qilghanliqini xatiriletken ministir faruq özlü, buninggha qarita ministirliq qarmiqidiki türkiye bilim we pen-téxnika tetqiqat idarisi (TÜBİTAK) teripidin yerlik markida aptomobil ishlepchiqirish tetqiqatlirining bashlanghanliqini qeyt qildi.

u mundaq dédi:

«yéngi xizmet sheklini otturigha qoyduq, buningda alahide sanaet sahesi aldinqi pilanda turidu we dölet qollaydu. mundaqche éytqanda, alahide sanaet sahesining bashlamchiliqida bu xizmet ishlinidu.»

u 2016-yili türkiyede 1.5 milyondin artuq aptomobil ishlepchiqirilghanliqini we buning %76 ning éksport qilinghanliqini bildürdi. u: «türkiye aptomobil sanaitide éksport qilidighan dölet hésablinidu. dunyadiki eng dangliq aptomobil shirketliri üchün zapchas ishlepchiqiridighan yan sanaitimiz bar. bu yerde bolmighan birdinbir nerse yerlik marka. inshaallah bu xizmetlirimiz yerlik markining dunyagha kélishi üchün qilishqa tégishlik xizmet bolup qalidu» dédi.