zeybekchi téhranda ziyarette boldi

türkiye awazi radiyosi xewiri: iranning paytexti téhranda bir künlük resmiy ziyarette bolghan iqtisad ministiri nihat zeybekchi bayanat bérip, «türkiye – iran munasiwetliride tijaretning güllinishi bilen birlikte bankichiliqmu güllinishi lazim. iran bankilirining türkiyede, türkiye bankiliriningmu iranda paaliyet élip bérilishi yolida kéreklik qedemler tashlinishi kérek. buninggha dair ilgiri imzalanghan bir kélishim bar. yéqinda bu jehette muhim qedemlerning tashlanghanliqini körimiz. <bankai millet> türkiyede shöbe achti. <xelq bankisi> iranda xizmet qilmaqta. yene <yéza – igilik bankisiningmu échilishini xalaymiz» dédi.

2016 – yilining axirida téhranda türk soda merkizining échilishining pilanliniwatqanliqini bildürgen zeybekchi, «iqtisad ministirliqimizning éksportni kücheytish dairiside chiqarghan qararigha asasen, dunyaning 13 merkizide échishni pilanlighan türkiye soda merkizining tunjisini téhranda ishqa kirishtürimiz. nahayiti körkem bir bina teyyarlandi. iqtisad ministirliqi bolush süpitimiz bilen pütkül ijarini biz töleymiz. shirketlirimizning kélip bu yerde ishxanilirini échishini we mehsulatlirini biwasite sétishini arzu qilimiz» dédi.

u, merkiziy bankilar arisida hasil qilinghan kélishimge asasen, ikki dölet arisida milliy pullarni ishlitish teyyarliqlirining axirqi basquchqa kelgenlikinimu sözlirige ilawe qildi.

zeybekchi téhrandiki ziyariti dairiside iran pirézidéntining birinchi yardemchisi ishaq jihangiri we iran uchur – alaqe we pen – téxnologiye ministiri mehmud waizi bilen körüshti. ikki dölet heyetliri arisidiki muzakiriler zeybekchi bilen iran kan, sanaet we soda ishliri ministiri muhemmed riza nimetzadining ishtirak qilishi arqisida ötküzüldi.

zeybekchige iran ziyaritide türkiye jumhuriyiti merkiziy bankisi, yéza – igilik shérikchilik, yéza – igilik bankisi, istanbul pay chéki baziri, türkiye soda – sanaetchiler jemiyiti, musteqil soda – sanaetchiler jemiyiti, türkiye éksportchilar mejlisi we xelqara toshughuchilar jemiyiti qatarliqlarning wekilliri hemrah boldi.