amérika bilen xitay arisidiki soda majiraliri köpeymekte

türkiye awazi radiyosi xewiri: b b s ning xewiride qeyt qilinishiche, amérika soda ministirliqi xitaydiki ishlepchiqarghuchilarning mehsulatlirini bazar bahasidin töwen sétish bilen eyiblep, baj nisbitini köpeytidighanliqini bildürgen. buninggha asaslanghanda, soghuq prokatlanghan polat taxtilardin hessilep baj élinidighan bolup, bu polat taxtilar aptomobil, konnteynir yasashta we qurulushlarda ishlitilidiken.

xitayda polat ishlepchiqirish sahesi ishqa orunlishish nisbiti bir qeder yuqiri sahe bolup, wol strét gézitining xewirige asaslanghanda, 2015 – yili xitaydiki polat ishlepchiqirish saheside 15 ming ishchi ishsiz qalghan.

xitayning sina pul – muamile torining xewirige asaslanghanda, amérika polat mehsulatliridin élinidighan bajni köpeytken hazirqi ehwalda, xitayning polat ishlepchiqirish saheside 400 ming ishchi ishsiz qalidiken. bu dawamlashqan ehwalda kéyinki üch yil ichide polat sahesige munasiwetlik sanaet türliride 3 milyon ishchi ishsiz qalidiken.

amérika bilen yawropadiki polat ishlepchiqarghuchilar xitayning özining ichki bazarliridin ashqan mallarni chet elge erzan bahada sétip, mehsulatlarning bahasini chüshüridighanliqini we xelqara bahani qalaymiqan qilidighanliqini ilgiri süridu. xitay bolsa, polat ishlepchiqirish miqdarini azaytqanliqini, bashqa döletlerdiki polat saheside körülgen mesililerning shu dölet iqtisadining ajiz bolghanliqidin kélip chiqqanliqini ilgiri sürmekte.