راما بۈگۈن تۈركىيەدە زىيارەتتە بولىدۇ

تۈركىيە ئاۋازى رادىيوسى خەۋىرى: تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسى بايانات ئېلان قىلىپ، زىيارەت دائىرىسىدە، تۈركىيە-ئالبانىيە يۇقىرى دەرىجىلىك ھەمكارلىق كېڭىشىنىڭ تۇنجى نۆۋەتلىك يىغىنىنىڭ ئەردوغان بىلەن رامانىڭ رىياسەتچىلىكىدە پايتەخت ئەنقەرەدە ئۆتكۈزۈلىدىغانلىقىنى ئۇقتۇردى.

كېڭەش يىغىنىدا، تۈركىيە-ئالبانىيە مۇناسىۋىتى ئەتراپلىق مۇھاكىمە قىلىنىپ، ئىككى تەرەپلىك ھەمكارلىقنى تېخىمۇ چوڭقۇرلاشتۇرۇش يولىدا تاشلىنىدىغان قەدەملەر مۇزاكىرە قىلىنىدۇ.

تۈركىيەنىڭ شىمالىي ئاتلانتىك ئەھدى تەشكىلاتى — ناتو ئىتتىپاقدىشى ئالبانىيە بىلەن ئۆتكۈزۈلىدىغان سۆھبەتلەردە، ئىككى دۆلەت مۇناسىۋەتلىرى بىلەن بىرلىكتە، بالقان رايونىدا تىنچلىق ۋە مۇقىملىقنى قوغداشنى چۆرىدەپ، رايون ۋە خەلقئارالىق مەسىلىلەر توغرىسىدا پىكىر ئالماشتۇرۇلىدۇ.

زىيارەت دائىرىسىدە، تۈركىيە-ئالبانىيە مۇناسىۋىتىگە پايدىلىق ھەر خىل قانۇنىي ھۆججەتلەر ئىمزالىنىدۇ.