xaqan fidan nato we yawropa ittipaqini tenqid qildi
tashqi ishlar ministiri fidan: «yawropa ittipaqining türkiyeni shérik emes reqip süpitide körüshi we bezi nato döletlirining türkiyening bixeterlik sezgürlüklirini oylashmasliqi, türkiyeni bashqa istratégiyelerni tereqqiy qildurushqa yüzlendürdi» dédi.
türkiye awazi radiyosi xewiri: xaqan fidan türkiye büyük millet mejlisi (parlaménti) (TBMM) omumiy kéngishide, ministirliqining 2024-yilliq xamchoti heqqide söz qildi.
u türkiyening tashqi siyasette xelqara küntertipini belgileydighan we halqiliq jughrapiyelik orunlargha tesir körsitidighan küchke aylanghanliqini bildürüp: «türkiyening exlaqiy qimmet qarishida ching turup, emeliyetchan we ünümlük tashqi siyaset yürgüzüshi ilgiriki her qandaq waqittikidin qimmetlik bolup qaldi. bu bizning ghezzediki zulumgha qarshi awazimizni ünlük chiqirishimizning sewebi. bedilining qanchilik chong bolushidin qetiynezer, némining <toghra>, némining <xata> ikenlikini déyishtin ikkilenmeymiz. biz pelestinlik qérindashlirimizni her daim qollap kelduq, kéyinki künlerdimu ularni dawamliq qollaymiz» dédi.
u süriyening zémin pütünlüki we siyasiy birlikige emel qilidighanliqlirini tekitlep, térrorluq teshkilatlirigha, bolupmu p k k|y p g gha qarshi küreshning dawam qilidighanliqini bayan qildi.
u shimaliy atlantik ehdi teshkilati-natoning siyasiti heqqide toxtilip mundaq dédi: «natodiki bir qisim döletlerning yéqinqi yillarda yolgha qoyghan siyasetlirige qaraydighan bolsaq, süriyede p k k|y p g ni qollishi we türkiyege mudapie sanaitide yürgüzülgen jaza ziddiyet peyda qilidu.»
u yawropa ittipaqi bilen bolghan munasiwet heqqidimu toxtaldi we mundaq dédi:
«yawropa ittipaqining türkiyeni shérik emes belki reqib dep qaraydighanliqi we natodiki bir qisim ittipaqdashlirimizning bixeterlik sezgürlükimizni oylashmasliqi dölitimizni téximu köp iqtidar we bashqa istratégiyelerni tereqqiy qildurushqa yüzlendürdi. bu biz üchün tallash emes, belki dölitimiz we millitimizning mewjut bolup turushining éhtiyaji bolup qaldi.»
