erdoghan amérikaning ottura sherq siyasitini eyiblidi

türkiye awazi radiyosi xewiri: jr erdoghan paytext enqerede awstiriye bash ministiri karl néxammér bilen körüshkendin kéyin ötküzülgen qoshma muxbirlarni kütüwélish yighinida söz qildi.

erdoghan ottura sherqte 7 – öktebirdin buyan keskinliship ketken jiddiychilik toghrisida toxtilip, amérika qoshma ishtatlirining rayonning hazirqi basquchida namayan qilghan pozitsiyesini tenqid qildi.

amérika hökümitining rayongha «USS Gerald R. Ford» namliq awiyamatkisini ewetish qararini «amérika awiyamatkisining israiliyede néme ishi bar?» néme qilish üchün kélidu? u awiamatka etrapidiki barliq kémiliri we awiyamatkidiki ayropilanliri bilen néme ish qilidu? «buningdin kéyin ular ghezze we uning etrapigha hujum qilish we yoqitish herikiti élip bérish arqiliq intayin éghir qirghinchiliqlarni qilishni bashlaydu» dep tenqid qildi.

erdoghan sözini dawamlashturup: «süriyede nöwette amérikaning 20 din artuq bazisi bar. süriyede amérika bazilirining néme ishi bar? bu bazilar arqiliq néme ishlarni qiliwatidu? 23 baza. bularning hemmisini muhakime qilish kérek emesmu? emma epsuski, amérika bölgünchi térrorluq teshkilati p k k gha qarshi heriket élip bériwatqan türkiyening bir uchquchisiz hawa apparatini étip chüshürüwetti. amérika uchquchisiz hawa apparatini étip chüshürüwetken hazirqi waqitta, türkiye amérikaning shimaliy atlantik ehdi teshkilati — natodiki hemrahi emesmu? bille emesmu? buni qandaq chüshendürimiz? biz buninggha qandaq baha bérimiz? menpeetimizge toghra kelgende, shérik bolimiz, toghra kelmigende, epsuski, amérika barliq térrorluq teshkilatlirini terbiyileydu, yétishtüridu we qorallanduridu. meyli süriyede yaki ottura sherqte bolsun, epsuski, bu yerlerni qan kölige aylanduruwatidu. bularni körüp yéteyli» dédi.

jumhur reis erdoghan rayondiki jiddiychilikni kücheytiwétidighan, téximu köp qan tökülüshni keltürüp chiqiridighan we saqliniwatqan mesililerni chongqurlashturuwétidighan qedemlerni tashlashtin saqlinishning mohimliqini tekitlep: «hazir ghezze su bilen teminlenmeywatidu. kishilik hoquq qéni?! tok yoq, teminlenmeywatidu. kishilik hoquq qéni? ejiba hazir ghezzediki doxturxanilarning ehwali qandaq? ishlewatamdu? epsus! emma ibadetxanilar we doxturxanilarning hemmisi rehimsizlerche bombardiman qiliniwatidu. bular sadir qiliniwatqanda héchkim héchnéme démeywatidu» dégenlerni qeyt qildi.

pelestin islamiy qarshiliq körsitish herikiti – hamasning herbiy qaniti bolghan «qessam birigadisi» shenbe küni israiliyege qarshi «eqsa topani» namliq keng kölemlik hujum qozghighanliqini élan qilip, ghezzedin israiliyege qaritip minglarche rakétamiyot atqan we qoralliq guruppilar rayondiki ahaliler rayonlirigha basturup kirgenidi.

arqidin israiliye armiyesi urush ayropilanliri bilen ghezzege qarshi «tömür qilichlar» herikitini qozghighanliqini élan qilghanidi.

künséri keskinlishiwatqan toqunush jeryanida ikki tereptin yüzlerche kishi talapetke uchridi.