fidan pelestin yighinliri üchün biryussélda ziyarette bolidu

türkiye awazi radiyosi xewiri: türkiye jumhuriyiti tashqi ishlar ministirliqi teripidin élan qilinghan yazma bayanatta körsitilishiche, biryussélda chaqirilidighan pelestin yighinlirida, ghezzediki özgirishler, barghanséri éghirlishiwatqan insaniy tiragédiye we pelestin dölitining téximu köp dölet teripidin étirap qilinishigha kapaletlik qilish tirishchanliqliri muzakire qilinidiken.

ziyariti dairiside ikki tereplik uchrishishlarni élip baridighan ministir fidan, pelestinge dawamliq yardem qiliwatqan xelqaraliq ittipaqdash döletlerning rehberliri pelestin bash ministiri muhemmed mustapa bilen bir yerge jem bolidighan «xelqara ittipaqdashlar uchrishishi» yighinigha qatnishidiken.

yighinda, pelestin bash ministiri mustapa hökümitining muhim pilan layiheliri we pelestin xelqi duch kéliwatqan xirislar heqqide doklat béridiken.

rehberler pelestin hökümiti bilen özara dawamliq diyalog ornitish, yéngi pelestin hökümitining muhim küntertip maddiliri, ghezzede derhal we uzun muddetlik urush toxtitish,  pelestin xelqige insanperwerlik yardem buyumlirini yetküzüp bérish, ghezzeni qayta qurush, islahat küntertipi we iqtisadiy we pul-muamile muqimliqi qatarliq témilarni chöridigen halda muzakire élip baridiken.

igilinishiche, ghezzege yetküzülüwatqan insanperwerlik yardem buyumlirining köp qismini türkiye teminlimekte iken. shundaqla, türkiye xelqaraliq her bir sehnide pelestinni siyasi jehettin qollimaqta hem pelestinlikler ara birlik we barawerlikke kapaletlik qilish tirishchanliqlirini teshwiq qilmaqta iken.