qurtulmush: dunya tinchliqi üchün pelestin mesilisi hel qilinishi kérek
türkiye büyük milliy mejlisi bashliqi numan qurtulmush, israiliye bilen pelestin otturisidiki ziddiyetni tügitip, xatirjemlikke kapaletlik qilinishi kéreklikini otturigha qoydi.
türkiye awazi radiyosi xewiri: türkiye büyük millet mejlisi bashliqi numan qurtulmush paytext enqerediki haji bayram weli uniwérsitétining oqush yili échilish murasimida söz qildi.
u 7- öktebir bashlanghan israiliye- pelestin toqunushi heqqide toxtilip: «ottura sherqte hemme kishining yashash hoquqi bar-de, bichare pelestinliklerning yashash hoquqi yoqmu?! israiliyening ottura sherqte mewjut bolup turush hoquqi bolsa, toluq menidiki bir pelestin dölitining mewjut bolush hoquqi yoqmu?! bu qosh ölchemge xatime bérilip, tinchliq we xatirjemlikni tézdin eslige keltürüsh tolimu zörür» dédi.
qurtulmush toqunushlarning toxtitilishini, insanlarni talapetke uchritishqa xatime bérilishini we xelqara jemiyetning mesuliyitini ada qilishini ümid qilidighanliqini tekitlep: «dunya tinchliqining ishiki ottura sherqning tinchliqi, ottura sherq tinchliqining ishiki bolsa, erkin pelestin qurulghuche pelestin mesilisini hel qilishtur» dégenlerni qeyt qildi.
u sözini dawamlashturup: «türkiye bolush süpitimiz bilen, biz israiliye- pelestin toqunushining axirlishishi üchün öz mesuliyitimizni ada qilishqa teyyarmiz» dédi.
türkiye büyük milliy mejlisi bashliqi qurtulmush yene, birleshken döletler teshkilati (b d t) ning mesililerni hel qilish iqtidarining yéterlik emeslikige naraziliq bildürüp, «b d t bir qeghez teshkilatqa aylinip qaldi» dédi.
