dölet xewpsizlik kéngishi ezerbeyjanning zémin pütünlükini alahide tekitlidi

türkiye awazi radiyosi xewiri: türkiye jumhur reisi rejep tayyip erdoghanning bashchiliqida tünügün (2023-yili 28-séntebir) paytext enqerede jumhur reislik mehkimiside ötküzülgen dölet xewpsizlik kéngishi yighinidin kéyin, xitabname élan qilindi.

xitabnamede, p k k|k j k-p y d|y p g (PKK/KCK-PYD/YPG) térrorluq teshkilatigha qanunluq qarshi turushning, bigunah kishilerni öltürgen, balilargha mejburiy halda  qoral tutquzghan, döletning tebiiy bayliqlirini talan-taraj qilghan bu qorchaq teshkilatning, tinchliq bilen xatirjemlikning aldidiki eng chong tosalghu ikenlikini süriye xelqiningmu testiqlighanliqi eskertildi. shuning bilen birge, bu «qatilliq tori »ni dawamliq qollawatqan aktiyorlargha, xelqara qanun we kishilik hoquqtin kélip chiqqan mejburiyetliri bilen ittipaqdashliq mesuliyetliri eske sélindi.

türkiyening texminen yérim esirge yéqin waqit ichide muhim xirislargha duch kéliwatqan dost we qérindash iraq xelqini dawamliq eng zor derijide qollaydighanliqi alahide eskertildi. kerkükte tinchliqni qoghdash we bu dölettiki térrorluq teshkilatlirini üzül-késil yoqitishning, rayongha qaritilghan siyaset pirinsipliri ichide ikenliki tekitlendi.

xitabnamede, b d t tinchliq saqlash qismining shimaliy qibris türk jumhuriyitining igilik hoquqigha we qibris türklirining eng eqelliy insanperwerlik éhtiyajlirining qamdilishigha tutqan qosh ölchemlik pozitsiyesi hemde paaliyetlirining bitereplik pirinsipigha mas kelmeydighanliqi, buning b d t ning inawitige ziyan salghanliqi tekitlendi. türkiyening xelqaraliq qanun we shertnamilerdin kélip chiqqan heq-hoquqliri dairiside, qibris türklirining bixeterliki we tinchliqining kapaliti bolushni dawamlashturidighanliqi qeyt qilindi.

xitabnamede mundaq déyildi:

«jenubiy kawkazda uzun muddetlik tinchliqni kapaletke ige qilish yolining ezerbeyjanning shertsiz zémin pütünlükining toluq emelge éshishi, rayonimizdiki barliq döletlerning parawanliqigha töhpe qoshidighan mejburiyitini ada qilghandila achqili bolidighanliqi mesilisi, erméniyeni öz ichige alghan barliq tereplerge xatirilitildi. türkiyening rayonda uzun muddetlik tinchliq we muqimliqini kapaletke ige qilish tirishchanliqlirini dawamlashturidighanliqi otturigha qoyuldi.»

ukrainada dawamlishiwatqan urushqa munasiwetlik eng yéngi özgirishler, qara déngiz ashliq kélishimini janlandurush qatarliq mesililerge munasiwetlik bésilidighan qedemlerning muzakire qilinghanliqimu bildürülgen xitabnamede, türkiyening 10-séntebir (2023) yüz bergen kelkün apiti seweblik qiyin künlerni bashtin kechürgen dost we qérindash dölet liwiye xelqige qilinghan yardemlerning dawamlishidighanliqi qeyt qilindi.