fidan ashliq kélishimi we quran kerimge hujum qilish qilmishliri toghrisida toxtaldi

türkiye awazi radiyosi xewiri: ministir xaqan fidan tünügün türkiyede ziyarette bolghan wénézuéla tashqi ishlar ministiri ywan gil bilen tashqi ishlar ministirliqining istanbuldiki wakaletxanisida körüshkendin kéyin ötküzülgen qoshma muxbirlarni kütüwélish yighini söz qildi.

fidan birleshken döletler teshkilati (b d t) bilen türkiyening ashliq kélishimi musapisini eslige keltürüsh yolida estayidil xizmetlerni ishlewatqanliqini, ukraina terepningmu tengdash charilerni tépishqa tirishiwatqanliqini tekitlep: «biz, türkiye bolush süpitimiz bilen, rusiye fédératsiyesining qaytidin söhbet üstilige élip kélinishi kéreklikige ishinimiz. buningdin bashqa hel qilish charilirining téngish xaraktérlik, bixeterlikke ziyan yetküzidighan hel qilish chariliri bolush éhtimalliqi pewquladde yuqiri» dédi.

u b d t bash katipi antonio gutérrés bilen bu heqte pikir birliki hasil qilghanliqini, rusiye tashqi ishlar ministiri sérgéy lawrow bilen ötküzgen uchrishishtimu rusiye terepning kélishimdin chékinip chiqishi we uni uzartmasliqining bir qatar tepsiliy seweblirige qulaq salghanliqini, nöwette bu mesililerning muzakire qiliniwatqanliqini éytti.

türkiyening bu mesililerni b d t bilenmu muzakire qilghanliqini tilgha alghan fidan: «biz rusiyening söhbet üstilige qaytip kélishi we teleplirining qandurulushi bilen birge, herqaysi tereplerning bu ishtin ghelibe qilghuchi süpitide chiqishini qolgha keltürüsh üchün tirishiwatimiz. men bu kirizisning baldurraq hel bolushini ümid qilimen» dédi.

ministir fidan yene, tünügün iraqning stokholmdiki elchixanisining aldida quran kerimge qilinghan hujumdin kéyin, künséri küchiyiwatqan quran kerimge hujum qilish qilmishlirini chöridigen halda iraq, seudi erebistan, we misirliq mensepdashliri hemde liwiye milliy ittipaqliq hökümiti bash ministiri abdulhemid dibeybe bilen körüshkenlikini, hemde islam hemkarliq teshkilatining tézdin yighin chaqirishi mesiliside birdeklik hasil qilghanliqini éytti.

nöwettiki asasliq küntertipning qandaq qilghanda kolléktip halette konkrét qedemlerni tashlighili bolidighanliqi mesilisi ikenlikini tilgha alghan fidan: «chünki biz, islam dunyasi bu mesilige teshkillik halette inkas qayturmisa, gherb döletliride tonush özgirishi hasil bolmaydu, dep oylaymiz» dédi.

türkiyening wénézuéla bilen bolghan munasiwitining chongqur yiltiz tartqan, küchlük munasiwet ikenlikini bildürgen fidan, ikki dölet munasiwetlirining yéqinqi yillarda kücheygen özara alaqe we ziyaretler sayisida janlanghanliqini eskertti.

fidan mensepdishi ywan gil bilen énérgiye, sayahet, qatnash, medeniyet we tereqqiyat qatarliq sahelerdiki munasiwetlerni muzakire qilghanliqini bildürdi.

wénézuéla tashqi ishlar ministiri ywan gil bolsa: «biz türkiyeni künséri küchiyiwatqan yoshurun küchke ige, tinchliq we tereqqiyatning kapaliti bir dölet dep qaraymiz» dédi.

u sözide yene, özlirining barliqining yer shari tinchliqigha béghishlanghanliqini tekitlep, türkiye bilen wénézuélaning oxshash nuqtini teshebbus qilidighanliqini, barliq ziddiyetlerni, bolupmu yawropadiki ziddiyetlerni söhbet arqiliq hel qilishni meqset qilidighanliqini qeyt qildi.