chet elde bélet tashlash bashlandi
5-ayning 28-küni türkiyede ötküzülidighan ikkinchi basquchluq jumhur reis saylimi üchün chet eldiki türkiye puqraliri bélet tashlashqa bashlidi.
türkiye awazi radiyosi xewiri: bu dairide, chet eldiki türkiye puqraliri 73 dölettiki 156 diplomatik wakaletxana we tamozhna éghizlirida bélet tashliyalaydu.
chet elde türkiye puqralirining awaz bérishi üchün jemiy 3461 bélet tashlash sanduqi tesis qilindi.
chet ellerde bélet tashlash 24-may küni tamamlinidu.
tamozhna éghizlirida bolsa bélet tashlash 5-ayning 28-küni saet 17.00 giche dawamlishidu.
2005-yili 5-ayning 29-künidin burun tughulghanlar, yeni birinchi basquchluq saylamdin kéyin 18 yashqa kirgenler ikkinchi basquchta bélet tashliyalaydu.
yaponiyede paytext tokyo we nagoya shehiride, ezerbeyjanda türkiyening baku elchixanisi, nexchiwan we genje bash konsulxanilirida, litwaniyede paytext wilnyusta, qirghizistanda türkiyening bishkek elchixanisida, qazaqistanda türkiyening astana elchixanisi, almuta we aqtaw bash konsulxanlirida, türkmenistanda türkiyening ashxabat elchixanisida tesis qilinghan bélet tashlash sanduqlirida bügün awaz bérish bashlandi.
igilinishiche, bélet tashlash yaponiye, litwaniye we qirghizistanda 21-may küni kechkiche, ezerbeyjan, qazaqistan we türkmenistanda bolsa 22-may küni kechkiche dawamlishidiken.
gérmaniyedimu türkiye puqraliri bélet tashlashqa bashlidi.
türkiye puqraliri gérmaniyening achén we régénsburg sheherliride 21 – may künigiche shu jay waqti etigen saet 9 din chüshtin kéyin saet 6 giche bolghan ariliqta bélet tashliyalaydu. bashqa jaylarda bolsa 24 – may künigiche shu jay waqti etigen saet 8 din chüshtin kéyin saet 10 ghiche bolghan ariliqta awaz béreleydu.
