erdoghan: apet rayonlirini eng qisqa waqit ichide qayta qurup chiqimiz

türkiye awazi radiyosi xewiri: jumhur reis rejep tayyip erdoghan milliyetchi heriket partiyesi rehbiri dölet bahcheli we büyük birlik partiyesi rehbiri mustafa destiji bilen birlikte 6 – féwral küni yüz bergen yer tewresh apitide éghir talapetke uchrighan malatya wilayitining doghanshehir nahiyeside xizmetlerni közdin kechürdi.

erdoghan türkiyening insaniyet tarixidiki eng chong tebiiy apetke duch kéliwatqanliqini eskertti.

u ministirlar, herqaysi organlar, sheherlik hökümetler, pidaiylar we eng muhimi keng xelq ammisining semimiy tirishchanliqi we qollishi astida eng qisqa waqit ichide weziyetni kontrol astigha alghanliqlirini qeyt qildi.

jumhur reis erdoghan yer tewresh apitide talapetke uchrighuchilarning her türlük éhtiyajlirini qamdawatqanliqlirini tekitlep mundaq dédi: «xelqimizning hayatigha xewp yetküzidighan barliq imaretlerni chéqip, ornigha téximu mustehkem yéngi binalarni sélip, puqralirimizgha tapshurup bérish iradimiz qetiydur.»

erdoghan yer tewresh apitide éghir talapetke uchrighan wilayetlerni eng qisqa waqit ichide qayta qurup chiqidighanliqlirini eskertip mundaq dédi: «biz ilgirimu mushundaq qilghaniduq. jümlidin, elazigh, malatya, izmir, düzje, wan wilayetlirimizde yüz bergen yer tewresh apetliride, antalya we mughla wilayetlirimizde yüz bergen ot apetliride, kastamonu, sinop, bartin we giresun wilayetlirimizde yüz bergen kelkün apetliride, bölgünchi térrorluq teshkilati p k k ning hujumliri netijiside xarabilikke aylanghan wilayetlirimiz we nahiyelirimizdimu nishanimizgha yetkeniduq. qisqisi, xelqimizge bergen wedilirimizni her qétim del waqtida emelge ashurduq.»