chet el rehberliri türkiye elchixaniliri we konsulxanilirini ziyaret qildi

türkiye awazi radiyosi xewiri: b d t bash katipi antoniyo gutérrés niyu yorktiki türkiye konsulxanisida qoyulghan teziye deptirige, «türkiye we süriyediki yer tewreshlerde jénidin ayrilghanlarning aililirige we yéqin-yoruqlirigha chongqur teziye bildürimen» dep yazdi.

u türkiye xelqining süriye musapirlirigha körsetken mertlikige guwah bolghanliqini eskertip: «milyonlarche musapir qobul qilindi, qoghdaldi, dertlirige ortaqlishildi. bu mert xelq xelqara jemiyet teripidin oxshash hemkarliqlarning, oxshash sadiqliqqa layiq» dédi.

amérika aqsaray dölet xewpsizlik meslihetchisi jék sulliwan girétsiyening washingtonda turushluq bash elchisi aléksandra papadopowlo we bezi kongre ezaliri hemde munasiwetlik kishiler bilen türkiyening washingtondiki elchixanisini ziyaret qilip, teziye tileklirini yetküzgenliklirini qeyt qildi.

yawropa ittipaqining tashqi munasiwetler we bixeterlik siyasiti aliy wekili josép borrélmu türkiyening biryusséldiki elchixanisigha bérip, yer tewresh apiti sewebidin échilghan teziye deptirige imza qoydi.

u: «siler yawropa ittipaqining küchlük ittipaqliqigha ishininglar, biz bu pajiede türkiye we süriye xelqi bilen bille» dédi.

ruméniye pirézidénti klawus ioxannis türkiyening buxarésttiki elchixanisini ziyaret qilip, jénidin ayrilghanlargha teziye bildürdi.

u teziye deptirige: «apetke uchrighanlargha yardem seperwelikini bashlash bilen birge, izdesh-qutquzush xizmetlirige yardem qilish üchün qutquzush etretlirini apet rayonlirigha ewettuq. apetke uchrighan minglarche aililerge sewr, yarilanghanlargha shipaliq tileymiz. ruméniye türkiyening yénida. izdesh-qutquzush xadimlirimiz hayat qutquzush üchün apet rayonlirida küresh qilmaqta. türkiye xelqi bu qiyinchiliqni choqum yingidu» dep yazdi.

shiwétsiye bash ministiri ulf kristérshon paytext stokholmdiki türkiye elchixanisini ziyaret qilip, teziye deptirige imza qoydi.

u: «yer tewresh apitide jénidin ayrilghanlarning aililirige we türkiye xelqige sewr tileymen. oy-xiyalim ularning aililiri bilen bille» dep yazdi.

girétsiye muawin tashqi ishlar ministiri miltiyadis warwijyotis afénadiki türkiye elchixanisini ziyaret qildi we teziye deptirige imza qoydi.

u mundaq dep yazdi:

«türkiyede yüz bergen ikki qétimliq yer tewreshte jénidin ayrilghanlargha, girétsiye xelqi we hökümiti namidin teziye bildürimen. girétsiye hemkarliq rohini namayan qilmaqta we jan qutquzush üchün pütün küchi bilen tirishchanliqini körsitidu. türkiyege sewr tileymen!.»

kirodiye bash ministiri andréj plénkowij paytext zagrébtiki türkiye elchixanisini ziyaret qilip, teziye deptirige imza qoydi we türkiye xelqige sewr tilidi.

bosniye-gértségowinada sarayéwu mesulliri türkiye elchixanisidiki teziye deptirige imza qoydi.

irélandiye pirézidénti mishél xigins türkiye elchixanisini ziyaret qilip, teziye deptirige imza qoydi.

u irélandiyening türkiye xelqi bilen hemkarliq we ittipaqliq ichide ikenlikini qeyt qildi.

özbékistan pirézidénti shewket mirziyayéw paytext tashkenttiki türkiye elchixanisini ziyaret qildi we teziye deptirige imza qoydi.

u özbékistanning türkiyege barliq zörür yardemlerni qilishqa teyyar ikenlikini bildürdi.

türkiyening paytext bélgradtiki elchixanisini ziyaret qilip, teziye deptirige imza qoyghan sérbiye pirézidénti aléksandar wujij: «biz silerning yéninglarda, aldimizdiki künlerde téximu köp yardemlerni qilimiz» dédi.

rusiye krémil sariyi bayanatchisi péskow yer tewreshte jénidin ayrilghanlargha teziye bildürüsh üchün paytext moskwadiki türkiye elchixanisini ziyaret qildi.

u teziye deptirige, türkiyege yardem qilishqa teyyar ikenliklirini bildürüp: «türkiye xelqi bilen bille matem tutuwatimiz. türkiye nahayiti qimmetlik we muhim qoshnimiz. tarix nuqtisidin bir-birimizge béqinimiz» dédi.