erdoghan türkiyening ornining özgermigenlikini bildürdi

türkiye awazi radiyosi xewiri: jumhur reis rejep tayyip erdoghan süriyede ichki urush bashlanghinigha 10 yil bolghanliqi munasiwiti bilen blumbérgda maqale élan qildi.

u maqaliside, türkiye xelqining, barliq süriyeliklerge wkillik qilidighan siyasiy sistéma qurulushining tinchliq we muqimliqni qayta ornitish üchün shert ikenlikige ishinidighanliqini bildürdi.

u süriyede tinchliq we muqimliqning qayta ornitilishining, gherbning türkiyeni semimiylik bilen qollishigha baghliq ikenlikige ishinidighanliqini eskertip: «démokratiye, erkinlik we kishilik hoquq qayta moda bolghan bügünki künlerde, insaniyetning süriyede qilghanliri, semimiylikimizning axirqi ölchimi bolup qalidu. iptixarlanghan halda shuni deymenki, türkiyening orni, süriye ichki urushi bashlanghandin tartip héch özgermidi. tinchliq we uzun muddetlik hel qilish charisining, süriyening zémin pütünlüki we siyasiy birlikige hörmet qilinmighan ehwalda emelge éshishining mumkin emeslikini tekitleymiz» dédi.

u yerlik küchler bilen birlikte shekillendürülgen bixeter rayonlarning, süriyening kélechikige bolghan sadiqliqining ispati ikenlikini bildürdi.

u gherbning aldi bilen bixeter rayonlargha hujum qilghan we qoli qangha boyalghan térrorluq teshkilati p k k ning süriyediki gumashtisi y p g gha qarshi éniq meydanini namayan qilishi kéreklikini qeyt qilip: «amérika pirézidénti jo baydin hökümiti bergen wediside turup, süriyediki tiragédiyeni axirlashturush we démokratiyeni mudapie qilish üchün biz birlikte xizmet qilishi kérek» dédi.

u gherb döletlirini insaniy kirizisni axirlashturush nuqtisida zémmisige chüshken mesuliyitini ada qilishqa chaqirip, türkiyening yükini bölüshmeslikning, yawropagha yéngi köch dolqunlirini keltürüp chiqirish mumkinlikini eskertti.