«türkiye nezerdin saqit qiliwétilgen héchqandaq bir pilan ishqa ashmaydu»

türkiye awazi radiyosi xewiri: qalin tünügünki ministirlar kéngishi yighini dawamlishiwatqanda bergen bayanatida, süriyede «firat deryasi» ning sherqide türkiye armiyesi teripidin élip bériliwatqan «<tinchliq buliqi> herbiy herikiti» netijiside shekillengen «bixeter rayon» da weziyet tinch hem muqim bolushtek shert – sharaitning yaritilghanliqini tekitlep mundaq dédi: «biraq bu rayonlardimu bölgünchi térrorluq teshkilati p k k ning süriyediki gumashtisi y p g / p y d dawamliq térrorluq paaliyetlirini élip bériwatidu.»

idlibta süriye hakimiyitining yéqindin buyan barghanséri ewj élip kétiwatqan hujumliri toghriliqmu toxtalghan qalin, mundaq dep körsetti: «hujumlargha derhal xatime bérilishini, buning yéngi bir urush toxtitish kélishimi arqiliq ishqa ashurulushini kütüwatimiz. rusiyedin kütüwatqinimizmu shundaq. bu nuqtida rusiye terepning nahayiti chong mesuliyiti bar dep qaraymiz.»

sherqiy aqdéngiz mesiliside misir, israiliye, jenubiy qibris rum hakimiyiti we girétsiyening bir yerge jem bolup, türkiyeni tamamen sirtta qaldurup, özara birqatar yighinlarni chaqirip, kélishimler hem layihelerni tüzgen chaghda héchkimning buninggha inkas qayturmighanliqini eskertken qalin, biraq türkiye bilen liwiye kélishim tüzgen haman «türkiyening xelqara qanungha xilap heriketlerni élip bériwatqanliqi» gha dair birqatar dewalarning ilgiri sürülgenlikini tekitlep mundaq dédi: «sherqiy aqdéngizda türkiye nezerdin saqit qiliwétilgen herqandaq bir pilanning ishqa éshishi mumkin emes. shuni alahide tekitlep ötimenki, liwiye hökümiti bilen italiye, firansiye qatarliq döletlermu kélishimlerni tüzgen, emma bu heqte héchkim detalash qilmighan, shunga türkiye tüzgen kélishimning qanunluq salahiyiti heqqide talash – tartish qilish héchkimning heddi emes, emma asasiy pirinsip jehettin, sherqiy aqdéngizda türkiyeni sirttda qaldurush arqiliq tinchlq we muqimliq ornatqili bolmaydighanliqinimu hemme yaxshi bilishi kérek.»