türkiye b d t da «ikki döletlik hel qilish charisi»ning ehmiyitini tekitlidi

türkiye awazi radiyosi xewiri: ehmed yildiz b d t ning amérika qoshma ishtatlirining niyuyorktiki merkizide chaqirilghan  jiddiy yighinida söz qildi.

b d t omumiy kéngishining 10-maydiki <pelestinning b d t gha toluq eza bolushining xewpsizlik kéngishide qayta muzakire qilinishini telep qilghan> qararining 143 döletning qollishigha érishishining, xelqara jemiyetning ortaq pozitsiyesini namayan qilip béridighanliqini bildürgen bash elchi yildiz, türkiyening bu tarixiy qarargha ortaq yétekchilik qilghanliqidin iptixarlinidighanliqini bildürüp: «bu qararning maqullinishi pelestinning dölet qurush yolidiki muhim abide bolupla qalmastin, u yene b d t xewpsizlik kéngishi bilen xelqara jemiyetning sadasi otturisidiki künséri küchiyiwatqan perqinimu namayan qilip béridu» dédi.

ghezze we gherbiy qirghaq (iyordan deryasining gherbiy qirghiqi)tiki weziyetning yenila éghir ikenlikige isharet qilghan yildiz: «pelestin xelqi xelqara qanungha qetiy hörmet qilinmastin, wijdansizlarche hujum nishani qilinmaqta» dédi.

bash elchi yildiz refahtiki künséri küchiyiwatqan jiddiylikning kishini endishige salidighanliqini, ghezzede tépilghan kolléktip qebrilerningmu weziyetning éghirliqini körsitip béridighanliqini tekitlep, israiliyening ghezzediki rehimsizlikining derhal axirlishishi kéreklikini we uning qaytilanmasliqi üchün, pelestin mesilisining ikki döletlik hel qilinishining shert ikenlikini eskertti.

yildiz türkiyening pelestinning b d t gha toluq eza bolushini qollaydighanliqini, bu qedemning pelestinliklerning igilik hoquqi we musteqilliq nishanini emelge ashurushigha kapaletlik qilidighanliqi hemde ikki döletlik hel qilish charisining süritini tézlitidighanliqini éytti.

türkiyening b d t diki daimiy wekili yene: «pelestin b d t ning toluq ezasi bolushqa we xelqara jemiyetning barawer ezasi süpitide muamile qilishqa erziydu» dégenlerni sözlirige ilawe qildi.