türkiye gérmaniyediki jame hujumlirigha naraziliq bildürdi

türkiye awazi radiyosi xewiri: türkiye tashqi ishlar ministirliqi gérmaniyede türk jamelirige hujum qilish weqelirining köpiyiwatqanliqidin endishe qiliwatqanliqi toghrisida yazma bayanat élan qildi. bayanatta, yéqinqi künlerde gérmaniye paytexti bérlin we etrapida türklerning ikki jamesining hujumgha uchrighanliqidin qayghu ichide xewer élinghanliqi eskertildi.

bayanatta, hujumlarda ölüm-yétim ishlirining körülmigenlikining birdinbir teselliy bolghanliqi tekitlinish bilen birge, 9-mart kéchisi loffénam nékardiki jamege qilinghan hujumning jawabkarliqini bölgünchi térrorluq teshkilati p k k ezalirining öz üstige alghanliqi, 10-mart bérlindiki jame hujumi jinayetchilirining téxiche éniqlanmighanliqi qeyt qilindi. bayanatta mundaq déyildi:

«yéqinqi künlerde gérmaniyede irqchi we islamgha qarshi qatlamlar bilen p k k térrorluq teshkilatining türk jamelirige qiliwatqan hujumlirida köpiyish körülgenlikini endishe ichide közetmektimiz. p k k ning loffénam nékardiki hujumgha jawabkar ikenlikini jakarlishi we bu xildiki hujumlarning dawamlishidighanliqini élan qilishi, bu teshkilatning heqiqiy epti-beshirisini yene bir qétim ashkarilap berdi. p k k gha yol qoymasliq heqqidiki agahlandurushlimizni yene bir qétim tekrarlaymiz.»

bayanatta yene, mezkur hujumlarning jinayetchilirining baldurraq tépilip, jazagha tartilishini we gérmaniyening munasiwetlik idare-organlirining oxshash hujumlarning yüz bermesliki üchün barliq kéreklik bixeterlik tedbirlirini yolgha qoyushining ümid qilinidighanliqi eskertildi.