ئەردوغان: ب د ت نىڭ قۇددۇسقا ئالاقىدار قارار لايىھەسىنى قوبۇل قىلىشى ئىنتايىن خۇشاللىنارلىق ئىش

تۈركىيە ئاۋازى رادىيوسى خەۋىرى: ئەردوغان قارار لايىھەسىنىڭ ئومۇمىي كېڭەشتە 9 غا قارشى 128 ئاۋاز بىلەن قوبۇل قىلىنىشىدىن كېيىن ئاممىۋى ئورتاقلىشىش تور بېتى Twitter سەھىپىسىدە تۈرك، ئەرەب ۋە ئىنگلىز تىللىرىدا ئېلان قىلغان باياناتىدا، بۇنىڭ تولىمۇ خۇشاللىنارلىق ئىش ئىكەنلىكىنى تەكىتلەپ مۇنداق دېدى: «بىرلەشكەن دۆلەتلەر تەشكىلاتى ئومۇمىي كېڭىشىدە قۇددۇسنىڭ سالاھىيىتىگە مۇناسىۋەتلىك قارار لايىھەسىنىڭ كۆپ سانلىقنىڭ ئاۋازى بىلەن قوبۇل قىلىنىشىدىن ئىنتايىن خۇرسەنمىز. ترامپ ھۆكۈمىتىنىڭ بىرلەشكەن دۆلەتلەر تەشكىلاتى ئومۇمىي كېڭىشى تەرىپىدىن غەيرىي قانۇنىي ئىكەنلىكى ئوچۇق – ئاشكارا ھالدا ئوتتۇرىغا چىققان بىمەنە قارارىدىن دەرھال ۋاز كېچىشىنى كۈتۈۋاتىمىز. پەلەسىتن ۋە قۇددۇس داۋاسىنى قوللىغانلارنىڭ ھەممىسىگە ئۆزۈم ۋە خەلقىم نامىدىن كۆپتىن- كۆپ رەھمەت ئېيتىمەن.»

جۇمھۇر رەئىسلىك سارىيى باياناتچىسى ئىبراھىم قالىنمۇ ئاممىۋى ئورتاقلىشىش تور بېتى Twitter سەھىپىسىدە ئېلان قىلغان باياناتىدا مۇنداق دېدى: «ترامپ ھۆكۈمىتىنىڭ قۇددۇس قارارىنى رەت قىلىش مەزمۇن قىلىنغان قارار لايىھەسى بىرلەشكەن دۆلەتلەر تەشكىلاتى ئومۇمىي كېڭىشىدە 9 غا قارشى 128 ئاۋاز بىلەن قوبۇل قىلىندى. بۇ تارىخىي قارار قۇددۇس ئۈچۈن، پەلەسىتن داۋاسى ئۈچۈن، دۇنياۋى ئادالەت ۋە ۋىجدان ئۈچۈن خەيرلىك بولسۇن.»