erdoghan maqale élan qilip, türkiyening ottura sherq siyasitini bayan qildi

türkiye awazi radiyosi xewiri: ‹yéngi türkiye istratégiyelik tetqiqat merkizi›‹yéngi türkiye zhurnili› ning axirqi sanini ottura sherq mesililirige ajratti. zhurnalning mezkur sanida jumhur reis erdoghanning «türkiye ottura sherqning birdinbir heqiqiy dostidur» dégen mawzuluq maqalisige orun bérildi.

bezi döletlerning ottura sherqni qaytidin layiheleshke tirishiwatqanliqini bildürgen erdoghan, rayonning zémin pütünlükining saqlap qélinishini otturigha qoyup kéliwatqan birdinbir döletning türkiye ikenlikini tekitlidi. u, «bu yerdiki nishan téximu asan mustemlike qilghili bolidighan, asan bashqurghili bolidighan, parche – parche bir qurulmini shekillendürüshtur. türkiye ottura sherqning zémin pütünlükini, muqimliqini, xatirjemlikini semimiy halda telep qiliwatqan birdinbir dölettur. türkiye ötmüshtikige oxshashla hazirmu ottura sherqning muqimliqining kapaletchisidur» dédi.

erdoghan maqaliside, süriyediki esed hakimiyitining 6 yildin buyan dölet térrori yürgüzgenlikini, rusiyeningmu öz menpeetlirini qoghdash üchün esed hakimiyitini saqlap qilishqa tirishqanliqini qeyt qildi we sözini «epsuski, bu qirghinchiliqlarning eng küchlük tesirige uchrighuchilarning biri türkmenlerdur. rusiyening we esed hakimiyitining türkmenler we puqralargha qilghan hujumliri körmeske séliniwatidu. rusiyening daéshqa qarshi küresh toni astida süriyede sadir qilghan jinayetlirige we qirghinchiliqlirigha ittipaqdashlirimizmu süküt qilmaqta» dédi.

maqaliside, PYD-YPG térrorluq teshkilatining süriyede zémingha ige bolush nishanigha qetiy yételmeydighanliqini yazghan erdoghan maqaliside yene, «térrorluq teshkilati PKK ning chégralirimiz ichidiki teshebbusigha oxshash bu sénariyelermu bikargha kétidu. dölet we millet süpitide xatirjem we bayashat bir ottura sherqning berpa qilinishi we uning dawamlashturulushi üchün herqandaq pidakarliqni körsitishtin qachmaymiz» dégen ibarilerge orun berdi.