30.01.2024
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
«yéngi shepeq géziti», jumhur reis rejep tayyip erdoghanning istanbul ayrodurumi métrosi kaghitxane-gheyrettepe liniyesining échilish murasimida qilghan sözide: «métro liniyesining tunji qétimliq tekshürüsh layihesidin tartip emelge ashurghiche bolghan pütün jeryanlarni özimizning yerlik inzhénérlirimiz we layiheligüchilirimiz bilen emeliyleshtürgenlikimizdin pexirlinimiz. biz emelge ashurghan her bir layihede yerlik we milliy layihelerning ülüshini ashurushqa ehmiyet bérimiz» dégenlikini xewer qildi.
«star géziti», tashqi ishlar ministiri xaqan fidanning ghezzede dawamlishiwatqan pajieler terepke hemmining diqqitini tartip: «minglighan insanni oq we bombardiman bilen yoqitip qoyghan bir peytte, emdilikte israiliye teripidin ghezzede görüge élinghan milyonlighan pelestinlikning acharchiliq we yuqumluq késellikler bilen qirghin qilinish xewipige duch kelmektimiz. ghezzege kirgüzüshke ruxset qilinmaywatqan insanperwerlik yardemliri we dawalash esliheliri ghezzening ichidiki hazirqi chong apetning bésharetchiliridur» dégenlikini xewer qildi.
«höriyet géziti», «nishan 40 milyon kubmétir ishlepchiqirish» serlewhilik xewiride, munu uchurlargha orun ajratti:
énérgiye we tebiiy bayliqlar ministiri alparslan bayraqtar filyos tebiiy gaz pishshiqlap ishlesh zawutida élip barghan tekshürüshliri jeryanida: «ishlepchiqirish miqdarimiz 2 milyon 700 ming kubmétirgha yetti, biz eng qisqa waqit ichide bu sanni 10 milyon kubmétirgha yetküzüshni, andin künige 40 milyon kubmétirgha yetküzüshni nishan qilmaqtimiz» dédi.
«sabah géziti», «chet elliklerning türksatqa bolghan qiziqishi künséri kücheymekte» serlewhilik xewiride, munu uchurlargha orun ajratti:
türksat süniy hemrahidin mulazimet éliwatqan chet el téléwiziye qanallirining sani üch yil ichide texminen%69 éship, eslidiki 83 tin 140 qa yetti. 2023-yilining axirida omumiy qanal sani 523 ke chiqti. bu özleshte chet el qanallirining qiziqishining éshishi kishilerning diqqitini tartmaqta.
«xeber türk géziti», amérika sayahet shirkiti «Lonely Planet» ning «dunya boyiche eng yaxshi déngiz sahili» tizimlikini teyyarlighanliqini, tizimlikte türkiyedin mughlaning fethiye nahiyesige jaylashqan kabak yézisining orun alghanliqini xewer qildi.
