25.01.2024
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
«sabah géziti», «erdoghan bilen reisi térrorluqqa qarshi hemkarliqni kücheytish toghrisida uchur berdi» serlewhilik xewiride, munu uchurlargha orun ajratti:
jumhur reis rejep tayyip erdoghan iran pirézidénti ibrahim reiysi bilen enqerede ötküzülgen birleshme muxbirlarni kütüwélish yighinida söz qildi. erdoghan térrorizmgha qarshi küresh toghrisida toxtilip, «döletlirimizning we rayonimizning bixeterlikini hujum nishani qilghan p k k/y p g/p y d we pjak térrorluq teshkilatlirigha qarshi hemkarliqimizni yenimu kücheytishning muhimliqini muzakirileshtuq» dédi.
«yéngi shepeq géziti», «erdoghan: <alem uchquchilirimiz alem boshliqigha seper qilishni dawamlashturidu> dédi» serlewhilik xewiride, munu uchurlargha orun ajratti:
jumhur reis erdoghan alem uchquchilirini alem boshluqigha ewetish arqiliq bu sahede tarixiy qedem tashlighanliqini éytti. erdoghan: «alem boshluqigha rakita yollash dawamlishidu, awiamatkimizning qurulushi dawamlishidu, paraxot etritimiz toxtimastin déngizgha chiqidu. chünki biz quruqluqta, déngizda, hawada, hemmila yerde mewjut bolimiz. inshaallah mudapie sanaitimizde küchimizni namayan qilishni dawamlashturimiz» dédi.
«höriyet géziti», sanaet we téxnika ministiri mehmet fatih kachirning eng muhim nishanlardin birining alem sanaitini tereqqiy qildurush ikenlikini otturigha qoyghanliqini hemde ishqa ashurulidighan layihelerni tertip boyiche tilgha élip, «süniy hemrah ishlepchiqirishta érishken tejribilirimizni yéngi türlerge yetküzimiz. enqerede alem téxnikisi tereqqiyat rayoni qurimiz. xelqaraliq layihelerge ishtirak qilimiz» dégenlikini xewer qildi.
«star géziti», «gezerawjining alem sayahiti dunyaning herqaysi jaylirida inkas peyda qildi» serlewhilik xewiride, munu uchurlargha orun ajratti:
alem boshluqigha chiqqan qazaqistanning üchinchi we dunya boyiche 545 - alem uchquchisi aydin aymbétow tunji türkiye alem uchquchisi alper gezerawchining alem boshluqigha chiqqanliqi heqqide toxtilip: «türkiyening xelqaraliq ademlik alem sayahitige qatnishishi dégenlik, türkiyening ademlik alem pilanining kelgüsi tereqqiyatidin dérek béridu. biz türkiye bilen hemkarlishishqa teyyarmiz» dédi.
«xeber türk géziti», amérikida pirézidént jo baydin hökümitining palata ezalirigha xet yézip, türkiyege 20 milyard dollarliq lokxid martin F-16 küreshchi ayropilani we zamaniwilashturush zapchaslirini sétishni testiqlashni telep qilghanliqini xewer qildi.
