30.10.2023
bügünki türkiye gézitliride asasiy salmaqni igiligen xewerlirimiz töwendikiche:
«‹hörriyet› géziti», «türkiye jumhuriyiti 100 yashqa kirdi» serlewhilik xewiride, töwendiki uchurlarni oqurmenlirining diqqitige sundi:
türkiye jumhuriyiti qurulghanliqining 100 – yili dölitimizning herqaysi jaylirida tentenilik halda tebriklendi. dölitimiz (türkiye jumhuriyiti) jumhur reisi rejep tayyip erdoghan atatürk xatire sariyining mexsus deptirige mundaq dep yazdi: «hörmetlik atatürk, biz 21 yil hakimiyet yürgüzgen mezgilde ishenchingizni qoghdashqa tirishtuq. jumhuriyitimizning 2-esirni <türkiyening 100 yilliq qutluq dewri> nishanimiz dairiside güllinishning eng yüksek sewiyesige ytküzimiz. jumhuriyitimiz hazir ilgiriki herqandaq waqittikidinmu bixeter.»
«‹sitar› géziti», dölitimiz (türkiye jumhuriyiti) jumhur reisi rejep tayyip erdoghanning, 1923 – yili 29-öktebir küni élan qilinghan türkiye jumhuriyitining tünügün birinchi esirni tamamlap, «türkiyening 100 yilliq qutluq dewri» dep atilidighan ikkinchi esirge qarap yolgha chiqqanliqini tekitlep mundaq dédi: «héchqandaq bir jahangir küch türkiye jumhuriyitining bextiyar bolushi, muweppeqiyet qazinishi we ghelibe qilishigha hergizmu tosalghu bolalmaydu.»
«‹xewer türk› géziti», munu uchurlarni oqurmenliri bilen ortaqlashti:
türkiye jumhuriyiti qurulghanliqining 100 – yilini tebriklesh paaliyetliri dairiside, « TCG anadolu» namliq paraxot bilen birlikte 100 urush paraxoti «istanbul boghuzi» din ötti.
paraxotlarning «istanbul boghuzi» din ötüshi jeryanida, «solo türk» we «türk cholpanliri» etretlirige ait 20 urush ayropilanimu «istanbul boghuzi» üstide türlük maharetlerni körsetti. ayropilanlarning körsetken maharetliri keng xelq ammisini cheksiz shadliqqa chömdürdi.
«‹weten› géziti», türkiye büyük millet mejlisi (parlaménti) reisi numan qurtulmushning türkiye jumhuriyiti qurulghanliqining 100 – yilini tebriklesh munasiwiti bilen qilghan munu sözlirini oqurmenlirining diqqitige sundi: «jahangirler qandaq oyun oynisun, xelqimizning rehberlikide yéngi bir dunya berpa qilinidu we pütkül dunya qanun boyiche idare qilinidighan yéngi tertip ornitilidu.»
«‹yéngi shepeq› géziti», türkiye büyük millet mejlisi (parlaménti) reisi numan qurtulmushning, pelestinliklerningmu türkiye jumhuriyitini qurush yolida nahayiti zor pidakarliqlarni körsetkenlikini tekitlep mundaq dégenlikini yazdi:
«pütkül dunyaning közliri aldida israiliye teripidin wehshiylerche qetl qiliniwatqan ghezzelikler we pelestin xelqi, ötmüshte jumhuriyitimining qurulush basquchliridiki barliq urushlarda ejdadlirimiz bilen bir septe jeng qilghandur.»
